CYLA hruaitute'n KMMTTP leimin an enfiah

Kaladan Multi Modal Transit Transport Project (KMMTTP) hnuaia Lawngtlai aṭanga Myanmar pawhtura kawngpui laih mek, kawng chunglam Lawngtlai District Hospital hnuai leimin chu Inrinni khan Central YLA hnuai a Disaster Response Sub-Committee hruaitute chuan a hmunah an enfiah.

Central YLA hnuaia Disaster Response Sub-Committee te hi an chairman Rohimliana'n a hoa, KMMTTP kawngpui laih vangin Lawngtlai khawpui tlaklam pang chu leimin nasa zawk a thlen mai an hlauhthu an sawi a, "Tuna a min nasatna lai hi a chaklam ah District Hospital leh Health Worker Training School te, Health department hmun pawimawh te a awm vangin thuneituten chakzawkin a venhimhna thawhk se kan duh," an ti.

Lawngtlai aṭanga thudawn danin, leiminna lai hi Lawngtlai AOC Veng, Mizofed Filling Station piah lawk a ni a, Lawngtlai District DMR chuan Lawngtlai DC hmalaknain, leimin zel tur ven nan hian a theih ang angin, Lawngtlai District Adventure Club-te nen ṭangkawpin silpouline hmanga khuhhna ni 11 chhung an thawk tawh a, sq. ft. 17,000 an khuh tawh.

Silpouline a khuh nimahse, lei hi a chetreng vang leh, leikhichat te a awm vangin Lawngtlai District Hospital building sakmek leh, quarter ṭhenkhat chu dinhmun hlauhthawnawm ah a awm mek a ni.

PWD hotuten an sawidanin tuna leimin hian District Hospital a thlenlohna chu metres 20 niin, Health department quarter ṭhenkhat chu metres 12 velin a la thleng loa, Health Worker Training School pawh metres 20 vel in leimin hian a la thleng lo a ni.