Tuirini-ah bailey bridge dawh ṭan

Seling-Tipaimukh kawng, National Highway 150-a Sesawng leh Khawruhlian inkara Tui­rini lui kânnaa thir lei (bailey bridge) dawh hna chu July 7, Inrinni khan PWD Mechanical Division-in an ṭan.

Khawruhlian Branch YMA hruaitute sawi dan­in, lei dawh hna thawktute hian Sesawng lam lui kama kawng chhuat laih zâwl ft. 150 vela thuiah lei dawhna thir (pannel) zawm hna July 7 khan an thawk ṭan a; thîr chu zawm zelin, zawi zawiin Khawruhlian lam luikam kai turin an nawr tawlh zel ang a, Khawruhlian lam luikamah recovery van-in a pawt dawn a ni.

Sesawng lam lui kama lei innghah chhan (abutment) chung aṭangin luikuang chhunga cement ban lian an chhun zawh tawh a, chumi chungah chuan lei tur thir an dawh a ni. Lei dawhna laia lui kuang chu ft. 210-a zau a nih avangin, bailey bridge chu ft. 210-a sei a ni dawn niin an sawi. Lei dawh hna hi tluang taka thawh a nih chuan tun kar tàwp lamah chuan lui kam lehlam thlengin lei tur thir chu nawr kai theih beisei a ni.

Hetih lai hian, lirthei tê chi-in lui a kaina tura thing leh mau hmanga lei an siam chu hman mek a ni bawk.