Zilla Sainik Board-in din champha an lawm

Zilla Sainik Board, Kolasib chuan July 7, Inrinni khan Kolasib IPR conference hall-ah an din champha an lawm a, bialtu MLA PC Zoram Sangliana'n a hmanpui.

PC Zoram Sangliana chuan, sipaite chu India ram himna atana mi pawimawh berte an nih thu sawiin, "Mizo sipaia ṭang mek bakah, báng tawhte pawh Mizo­te tihmingṭhatu an ni a, India ram zau taka dinhmun zahawm taka Mizoram hlangkaitu an ni. Nunau, khawtlang leh mipuite tan thlamuanna an ni," a ti.

Counter Insurgensy & Jungle Warfare (CIJSW), Vairengtea deputy commandant Brig. SS Mohite chuan, sipaia Mizoram quota hnawhkhah a ni ngai lo chu pawi a tih thu sawiin, "Ram tan mai bakah, taksa hriselna leh mahni invawn leh inthunun nan sipaia ṭan hlâwkzia Mizo ṭhalaite hnenah tlangaupui a pawimawh," a ti a; inkhawma tel sipaia ṭang ṭhinte zahna chibai bûkin duhsakna a hlan.

Inkhawmah hian sipai aṭanga báng tawh kum 80 chung lam mi 10 hnenah leh, indona vanga sipai thi nupuite leh indona vanga pianphunga rualbanlote hnenah chawimawina thilpek hlan a ni.