Sorkar sum hman dik loh thu-ah Sorkarin FIR a thehlut tur a ni - CAG

Assembly session hnuhnung bera Finance Minister-in a pharh tâk, Report of the Comptroller and Auditor General of India on State Finance-ah chuan sorkar sum hman dik lohna pathum tarlan a ni a, "Heng sum hman dik lohnaahte hian sorkar chuan FIR a thehlut tur a ni," tia ziah a ni.

CAG-in an report-a sorkar sum hman dik lohna an tarlante chu - Chakma Autonomous District Council (CADC), Mizoram Building & Other Construction Welfare Board leh Border Area Development Programme (BADP)-ahte a ni.

CAG tarlan danin, CADC chuan October 2009 - March 2013 chhungin Longpuighat - Kukuduleya kawng siamna atan cheng vbc. 11.29 an hmu a, chuta ṭang chuan cheng vbc. 8.42 chu kawng siamna atana an hmang tih finfiahna an nei.

Kawng siamna atana hman bak cheng nuai 287 aṭangin cheng nuai 170 chu chief executive member (CEM) hlui hnenah leh cheng nuai 78 chu member of district council (MDC)-te hnenah pek a ni. MDC-te hi hlawh atana pek lâwk an ni a, CEM pek chhan erawh tarlan a ni lo.

CADC chuan, MDC-te hnena pek cheng nuai 78 chu rulh a nih tawh thu leh, CEM hnena pek nia tarlan cheng nuai 170 awmna chu departmental inquiry hmanga chhui mek a nih thu CAG-te an hrilh.

Mizoram Building & Other Construction Workers Welfare Board (MBOCWWB) hnuaiah chhiah (cess) tlingkhawm chu dan dik loin office inrêlbàwlna atana hman a ni. Danah chuan hlawh, office inrêlbawlna, etc. atan sum hman ral zawng zawng aṭanga 5% aia tam financial year khat chhungin hman a phal lo.

Hetih lai hian, MBOCWWB chuan kum 2016-17 chhung khan cess aṭanga sum tlingkhawm aṭangin cheng nuai 1334 an hmang a, chuta ṭang chuan cheng nuai 147 (11.02%) chu office inrêlbàwlna atan an hmang a ni.

BADP hnuaia CAG-in sum hman dik loh a tarlan dan chuan, Champhai BDO chuan elec­trical repairing, desktop publi­shing leh mobile repairing training kum 2013-14 khan an buatsaih.

Training-ah hian mi 90 telin, an senso chu cheng nuai 3.24 a ni a, nuai 3.24 chu voucher siam danglamin ṭum hnih lak chhuah a ni. Hemi chungchangah hian department chuan thudik hai chhuak tura chhui mek a nih thu December, 2017 khan CAG an hrilh.

CAG chuan, sorkar sum hman dik loh chungchangah hian sorkar chuan FIR a thehlut ngei tur nia an hriat thu report-ah an tarlang tel a ni.