FDA-in Nabati hlauhawmna an hre lo ; Health deptt-in lab.-ah an enfiah dawn

Kamram (wafer) chi khat, Nabati chu tun hnaiah mi ṭhenkhatin an ei avangin harsatna an tâwk anga social media-a thu thehdarh a awm a; hemi chungchangah hian Health & Family Welfare department-a Food & Drugs Administration (FDA) chuan laboratory-ah an enfiah dawn.

Nabati-in mihringah harsatna a thlen thei anga thu thehdarh chung­changah hian Health department-a deputy director (FDA) Lalsawma Pachuau chuan Vanglaini palai zawhna chhangin, Nabati ei vanga harsatna tâwk an awm thu an la dawn loh thu a sawi a, "Mipui aṭangin report tun thlengin kan la dawng lo a, mihring tan a ṭha lo tih rinhlelh ngaihna a la awm lo," a ti.

Mipui aṭangin report/complaint dawng lo mah se, mipui tirálkhêl thei a nih avangin an endik dawn tih sawiin Lalsawma chuan, "Vawiinah (July 9) Nabati sample kan la khawm a, Kolkata-a private laboratory ṭhaah kan enfiahtir dawn a, Nilaini (July 11)-ah kan thawn theih kan beisei," a ti a; an enfiahtirna tur laboratory chu private ni mah se, Food Safety & Standard Authority of India (FSSAI) pawmpui a nih thu a sawi.

Lalsawma Pachuau chuan, Nabati chu Mizo­ramah India rama siam leh Indonesia rama siam a awm thu a sawi rualin, India ram leh Indonesia rama siamtu company-te chu company pakhat ang deuh, thawkhoa siam chhuak leh technology thuhmun hmanga siam an nih thu a sawi a, "Nabati hi FSSAI pawhin a pawmpui thlap a ni a, tunah chuan mihring tan a hlauhawmna kan hre rih lo," a ti.

Health Deputy Director (FDA) sawi danin, tun hnaia social media-a thla­lak nena tarlan, Nabati ei vanga harsatna tâwk hmeichhe pakhat Seventh­day Hospital-a enkawl anga sawi chu chhui chian a ni a, damdawi-in record-ah chutiang chu an awm lo. Damdawi-in hian naupang pakhat chu ellergy vangin an chiu a, mahse, chu chu Nabati ei vanga sawi a ni lo thung.

Lalsawma Pachuau chuan, Nabati emaw, thil dang, ei leh in chi-in mihringah harsatna a thlen thei a nih chuan a hre hmasa ber turte zinga mi an nih thu sawiin, tun hnaia social media-a thu thehdarh chu sumdawnna thila inphiarrûkna leh intihchhiat tumna a nih ve theih thu a sawi bawk a ni.