MNF-in Mizoram Lottery Office an dang ; Lottery-ah CM-in hlâwkna a neih an ring

Mizoram sorkarin lottery a kalpui mek tihtawp phûtin MNF party-te chuan MNF ṭhalai bultumin nimin khan Mizoram State Lottery pisaa an dang a, lottery kal mek tihtawp a nih loh chuan Lottery office hi dan chhunzawm zel an tum. MNF-te hian Mizoram Lottery kalpui mektute aṭangin chief minister Lal Thanhawla'n a mimalin hlâwkna a neih ngei an ring.

MNF-te chu nimin chawhma dar 9 vel aṭang khan Lottery office kawtah pungkhawmin, pisa kai turte an lo dang a; Lottery pisaa thawkte chu pisaah an lut thei lo a ni. MNF-te thil tih avang hian buaina leh harsatna lian a thleng lo a, police eng emaw zat an duty a ni. MNF senior vice president Tawnluia chuan, Mizoram sorkarin tuna lottery kalpui mek chu a tihtawp hma chuan Lottery pisa dan an tum thu a sawi.

MNF Senior Vice President chuan nimin khan Mizo Hnam Rûnah thuthar thehdarhtute kâwmin, lottery kalpui mek chu tihtawp ngei an phût thu a sawi a, "Kum 2008-a Congress sorkar a pian aṭangin lottery hi duhsak zawngte nena sam inphiarzawm nan kan CM Lal Thanhawla hian a hmang ṭangkai hle a, a duhsak bik vai sumdawngte'n duh tâwkin vawiin thlengin an chalâi mawlh mawlh a ni," a ti.

Tawnluia chuan, lottery aṭangin Mizoram sorkar sum báwma lut a tlem hle laiin, sorkar hotu mi tlemtêin an hlawkpui hle thung tih sawiin, "Lottery-a thil dik lo inphûm leh siamṭha tura sorkar phût nan MNF chuan vawi nga press conference koin kan puang chhuak tawh," a ti a; chuti chung chuan Chief Minister-in maimitchhíng chungin lottery sum a la hâi buan buan zel tho niin a sawi.

December 2011-a lottery ten­der sorkarin a chhuah chu vai sumdawng pali intiamrualte'n a chhàn theihna hniam ber, inzat vekin an chháng tih sawiin Tawnuia chuan, "A chhángtu zawng zawngin chhàn theihna hniam bera an chhàn hi tender chi hrang hrangah thil awm ngai lo a ni," a ti.

MNF Sr. Vice President sawi danin, kum 2012-ah Lottery Commi­ttee-in tender ko ṭha leh turin rawtna a siam a, mahse, CM Lal Thanhawla'n Lottery Committee thu chu a hnâwl a, note­sheet-ah, 'I am sorry, I do not accept the recommendation of the Lottery Committee...' tiin a ziak a; tender chhuah ṭha loin May 29, 2012 aṭanga May 28, 2014 chhunga lottery kalpui tur an thlang a ni.

Mizoram Lottery kalpuitute term chu May 28, 2014-a a tàwp hnuah kum khat dang atan (29.5.2014 - 28.5.2015) pawhseisak a ni a, chu chu a tawp leh hnuah, kum thum dang atan (29.5.2015-28.5.2018) an pawhseisak leh bawk.

Mizoram Lottery kalpui dan chu a ṭawp em avangin sorkar laipuiin Comptroller and Auditor General of India (CAG) a chhuitir a, CAG chuan kum thum - 2012-13, 2013-14 leh 2014-15 chhunga lottery kalpui dan a chhui zui a ni. Kum 2016-a CAG report, FInance minister Lalsawta'n Assembly House-a a pharhah chuan, kum 2012-2015 chhungin Mizoramin lottery aṭanga sum a hmuh tur vbc. 11,808.77 a hloh thu leh, Mizoram sorkarah cheng vbc. 25.45 chiah a luh thu tarlan a ni.

Tawnluia chuan, Mizoram Lottery kalpui dan chu Lottery Regulation Rules, 2010 kalh tlat a nih thu sawiin, Competition Commission of India (CCI) beng pawh a thleng hial tih a sawi a, "CCI hian an chhui zo tawh a, tunah Supreme Court thutlukna an nghah mek a ni," a ti a; CAG-in a la chhui tel hman loh, kum 2015-16, 2016-17 leh 2017-18 chhung pawhin Mizoram sorkarin sum tam tak a hloh ngei a rinawm thu a sawi.

CM Lal Thanhawla'n lottery chungchang chu CBI chhuitir a inhuam thu a sawi lai leh MNF-in vawi tam tak chhuitir tura an ngen tawh chungin tun thlengin hma a la tak tak ngam lo nia sawiin Tawnluia chuan, June 29, 2018-a Congress Bhavan-a Lottery CBI chhuitir tura hma a la ang leh CBI-in chhui tlakah an ngai lo anga a sawi hi dâwt chiang tak a ni. Vawi khatmah sorkar hian CBI chhuitir turin hma a la la lo. Hmui dawthei CM kan nei hi a vanduaithlak hle," a ti.

MNF Sr. Vice President chuan, lottery kalpui mektute term May 28, 2018-a a tâwp tawh chunga tun thlenga an la tihtir zel chu tihtawp nghal an phût thu sawiin, an thil phût chu tihhlawhtlin a nih hma chuan hma an la chhunzawm zel dawn a, Lottery Office pawh an dang chhunzawm zel dawn tih a sawi.

Mizoram Lottery-ah CM Lal Thanhawla'n chan (share) a neih an rin leh rin loh chungchanga zawhna chhangin MNF Vigilance Committee chairman R Tlanghmingthanga chuan, "Heti taka dan loa an duhsakte hian CM hi duhsak let ve nacháng an hriat ngei a rinawm," a ti. "Mimal interest tihtawp a nih a, mipui tan kan thleng huai ngam khawp ang," a ti bawk.