MLA inthlanah thatchhiat zirna leh taimak zirna bûk a ni dawn - ZPM Secy.

Ṭangrual pawl, Zoram Peoples' Movement (ZPM) chuan nimin khan an pisaah chhung inkhawm an hmang a; thu sawitu, ZPM secretary general K Sapdanga chuan, kumina Assembly inthlan awm turah taimâk zirna leh thatchhiat zirna bûk a nih tur thu sawi.

ZPM Secretary General chuan, inthlan lo awm turah thatchhiat inzirtir ṭha zawka ring tlat pawl pahnih an awm dawn thu sawiin, "Pakhat zawk chuan mipuite thatchhiat zirtirna atan cheng nuai khat pawisa faia sem a tâwk chauhin an hria a, an lo tih mek chu chhunzawm an tum a, pakhat zawk dang thatchhiat inzirtirna atan cheng nuai thum tal pawisa faia sem ṭulin an ring a, ṭhanemngai takin an aupui mek a ni," a ti.

Taimak inzirtir ṭha zawka ringtute chu pawl pasarih ṭangrual an nih thu sawiin K Sapdanga chuan, "Mipui hnenah sumfai a thlawna sem an tiam ve lo a, mipuite chu chem leh tuthlawh an kawhhmuh a, sawhthing chíng turin thurawn an pe a ni. An sawhthing thar hunah quintal khat Rs. 5,000 zela leina tur budget-ah pawisa an lo dah dawn tih an puang lâwk a ni," a ti a; duhthlanna bûk hun atan mipuite'n an rilru an siam fel tawh thu a sawi.

ZPM Secretary General sawi danin, mipuite'n kum nga chhunga Rs. 1,00,000 emaw, Rs. 3,00,000 emaw instalment-a dawn ai chuan, sawhthing quintal 50 pawh thar se, kum tin Rs. 2,50,000 an dawng ang a, kum nga chhungin Rs. 12,50,000 an thawk chhuak thei dawn a; chu chu hriain vote chhuah an tum tawh a ni.

ZPM a sorkar chuan Mizo chu hnam taima an ni tih finfiah a ni ang a, hna thawk tura infuih a ngai tawh lo ang. Hriselnain a tawrh khawpa thawkrim lutuk lo turin, a kum leha thawk chhunzawm thei tura tha khêk thiam turin nasa taka infuih a ngai tawh zawk dawn a ni.

ZPM-in sorkarna a siam chuan kar loah Aizawl khawpui a thâwl hawk dawn nia sawiin K Sapdanga chuan, "Veng daiféma in luah man chawi chunga ni tin inhlawhna zawn ai chuan, mahni khaw lama haw a, sawhthing hmun siam kha a let tam takin a hlâwk zawk dawn a, a hlimawm zawk daih tih hi inzirtir thar a ngai dawn lo. Káwl nula puantahtute leh kawng laitu labour Santali-te pawh thawk leh khata an bo duak chhan chu, an ramah sorkar ṭha a piang a, hlâwk zawka thawh tur hna an ramah a tam tâk vang a ni," a ti.