KHAWTHLIR

Ruihhlo do dun dawn
Central YMA hruaitute leh Synod Social Front hruaitute chu nimin khan Synod executive secretary Rev. B Sangthanga pisaah an inkâwm a, ruihhlo do dan tur an sawiho a, thawhho an rêl.Synod Social Front leh CYMA-te hian ruihhlo do kawnga thawhho zel an rêl a, hmalakna pakhat atan CYMA hnuaia SRS-te'n an mi mante Pathian thu lama counselling neihphui ṭhin turin Synod Social Front-in counsellor pakhat a ruahman nghal. Hei bakah hian, a ṭul anga hmalakho zel an tum a ni.

Vawk lak luh khap
Aizawl DC chuan thupek chhuahin, Aizawl district-ah vawk hri, Porcine Reproductive & Respiratory Syndrome (PRRS) a lêng meka hriat a nih avangin, Aizawl district chhungah hmun dang aṭanga vawk lak luh district danga vawk thawn chhuah a khap a, "Vawk neitute'n vawk damlo an hralh tur a ni lo a, a talhtute pawhin vawk hrisel ṭha chauh an talh tur a ni," a ti. Thupek hian thla hnih chhung a huam dawn a, thupek zâwm lote chu IPC Section 188 hmanga hrem tur an ni.

Reduction Sale
Synod Bookroom chuan nimin aṭang khan Aizawla an showroom leh hmun hrang hranga an branch tinah Reduction Sale an ṭan a, July 14, Inrinni thleng a awh ang. Reduction Sale-ah hian an thil zawrhte chu 5% - 80% in an titlawm a ni.

Dan chhunzawm
Mizoram Tipper Owner's Association leh Drivers Association-te'n hnam dang tipper, dan dik loa Mizorama register nia an hriatte June 6, 2018 zan aṭanga Kolasiba an pisa bulah an dan chu an la chhunzawm zel. Forum for Protection of Non Mizos invuahten Lailapur-a bungraw phur motor Inrinnia an dan erawh chu Inrinni tlai lam khan Cachar DC thupek angin tihtawp a ni thung. He thil thleng chungchangah hian vawiin hian Kolasib DC leh Cachar DC an inbia ang.