NEC Meeting-ah Governor leh CM Hawla
North Eastern Council (NEC) meeting vawi 67-na chu nimin khan Shillong-a State Convention Centre-ah ṭan a ni a, Union Home minister Rajnath Singh-a'n a kaihruai. Meeting-ah hian Mizoram Governor Kummanam Rajasekharan leh chief minister Lal Thanhawla te pawh telin, Mizoram sorkar hmalakna leh mamawhte an sawi.
Governor Kummanam Rajasekharan chuan, NEC tihchak zel a ṭul sawiin, NEC chu hmasawnna scheme hrang hrang kalpui bakah, buaina chinfel kawngah te, hmasawnna tur ruahmanna leh thiamna hmunpui knowledge hub atana council ruat a ni chuan chak zawka hmasawnna a thlen phah a beisei thu a sawi a, "India hmarchhakah awmze nei zawka hna thawk thei tura sum leh pai leh thawktu ṭhaa thuam a pawimawh a, Union Home Minister kaihhruainain mumal leh chak zawka NEC a kal theih ka beisei," a ti.
CM Lal Thanhawla chuan, NEC chu dinhmun pawimawh leh chak zawka dah a ṭul thu sawiin, "India hmarchhak state-te hi 'new growth centre' atana siam turin sum tam tham zawk leh thawktu ṭha zawk kan mamawh a ni," a ti a; Act East Policy a taka chantir turin hmarchhak state-te policy duanna leh a taka thawhna turah an tel ngei ngaih thu leh, hmarchhak bialah development policy kalpui hmasak a ṭul thu a sawi.
Lal Thanhawla chuan, kum 2017-18 aṭanga 2019-20 chhunga India hmarchhak state zawng zawng tan NEC hnuaia cheng vbc. 4,500 dahin project kalpui mekte a huam tel avangin, project thar hlak siamna tur a daih dawn lo tih a sawi a, chuvang chuan, NEC-a sum dah tipung turin Union Home Minister a ngen a ni.
NEC Meeting-ah hian Union minister of state for DoNER Dr. Jitendra Singh leh India hmarchhak state hrang hrang Governor leh Chief Minister-te an tel a, vawiinah chhunzawm a ni ang. India hmarchhak state-a chief secretary-te leh Planning secretary-te pawh an tel a, Mizoram Planning secretary Dr C Vanlalramsanga leh official dangte an tel a ni.
Tun ṭum NEC Meeting-ah hian thu pawimawh tak tak an ngaihtuah zingah, March 2020 thlenga NEC scheme kalpui chhunzawm chungchang te, NEC inkaihhruaina ṭhenkhat ennawn te, Aspirational district 14-a hmalakna te, kum 2011-a kut hnathawktute sum lak luh a lêta tipung tura hmalakna chungchang leh thil pawimawh dang a tel.
NEC hi kum 1971-ah din a ni a, India hmarchhak state pariat - Arunachal Pradesh, Assam, Manipur, Meghalaya, Mizoram, Nagaland, Sikkim leh Tripura-te tihmasawn tura nodal agency a ni. Union Cabinet chuan June 2018 khan Union Home Minister chu NEC Ex-Officio Chairman atan a ruat a, Minister for Development of North Eastern Region (DoNER) chu Vice Chairman atan a ruat bawk.