Mizoram siamṭha turin ṭan kan la mek - Mizoram BJP President

BJP Mizoram Pradesh president Prof. JV Hluna chuan, Mizoram siam ṭha turin mi tu pawhin BJP an sáwm reng nia sawiin, Mizoram siam ṭha turin ṭan an lak mek thu a sawi.

Nimina Aizawla BJP pisaa inkhawm­ah thu sawiin JV Hluna chuan, Mizoram tluchhe mek tungding tura Congress, MNF leh party dang mi, BJP zawm duh an awm chuan an lo lawm zel dawn tih a sawi a, "BJP aṭang lo chuan hmasawnna tak tak leh kan beisei hi kan hmuh theih dawn loh avangin, a kawng awmchhun chu Mizoramah BJP sorkar a din hi a ni," a ti.

Prof. JV Hluna chuan, Mizoram budget ringawt chu Mizoram hmasawnna a taka thlen theihna tur khawp a tling lo nia sawiin, "Mipui mamawh phuhru tur khawp sum a awm lo a, Central special package kaltlanga mipui mamawh tam zawk kan siam a ngai a ni," a ti a; Mizorama kut hnathawktute'n an thar chhuahah an hah mila sum an hmuh theih nan hma an la dawn niin a sawi.

Mizoram BJP President chuan, politic chu dâwt tel loa khelh a hun tawh tak zet nia sawiin, "Mizo mipui rilru thianghlim takte hian hmasawnna dik kan hmuh hlan kan nghakhlel hle tawh. Chumi tichiangtu chu, BJP hi kawng tinrêngin dâwt hmangin min bei mah se la, khaw hrang hrangah BJP unit thar a ding reng hi a ni," a ti.