Kolasib dist.-a Bru lak let dan tur sawiho

Kolasib-a sorkar official-te chu Home joint secretary Lalbiaksangi hoin nimin khan DC conference hall-ah an ṭhukhawm a, Tripura relief camp paruk aṭanga Mizoram Bru, Kolasib district lâk lêt tur chhungkaw 824 hruai kir dan tur an ngaituah.

Meeting-ah hian Bru lak let turte tuna an awmna aṭanga Kolasib district chhunga hruai kîr dan tur te, an kalna tur lirthei ruahman dan tur te, an awmna tur khua thlenga hruai dan turte leh chhawmdawlna pek dan turte an rêl a ni. Hruai kîr hna thawk turin liaison officer leh mawhphurhna dang changtu turte an ruat a; mawhphurhna bik neite chu August thla chawlh­kar khatnaah an tih turte hrilhfiah an ni.

Sorkar thuchhuah tarlan danin, Bru lak let turte chu vote an neihna hnaih ber khuaah dah tur a ni a, Kolasib district-a dah tur Bru chhungkua 824 an awm. Kolasib district-a dah turte chu Kaskau aṭangin chhung­kaw 30, Khakchangpara camp aṭangin chhungkaw 14, Hamsapara aṭangin chhungkaw pariat, Asapara aṭangin chhungkaw 391, Naisingpara aṭangin chhungkaw 323 leh Hazacherra aṭangin chhungkaw 58 an ni.

Sorkar laipui, Mizoram sorkar, Tripura sorkar leh Mizoram Bru Displaced Peoples Forum (MBDPF)-te'n Draft Agreement an siam angin, Bru-te chu August 16 aṭanga September 30, 2018 chhunga lak let tur an ni a; Kolasib chauh ni lo, Mamit district leh Lunglei district-a dah turte nen Bru lak let tur zawng zawng chu chhungkua 5,407-a mi 32,876 an ni.

Ruahman dan chuan, Bru-te chu Mizorama an luh ní-ah staging area-ah zan khat an awm laiâwk ang a, chutah chuan ei leh in, tui in tur, inthiarna leh damdawi lamte ruahmansak tur a ni. Staging area-a zan khat an riah hnuah an awmna tur khua an pan ang a, an awmna tur khua ṭheuhah an chên lailâwkna tur in sak a ni ang.

Sorkar aṭanga in sak ṭanpuina chhungkaw tinin an dawn tur Rs. 1,50,000 chu direct benefit transfer (DBT) kaltlangin chhâwng thuma pek tur a ni a; an awmna tur khua an thlen tirhah Rs. 25,000 ṭheuh pek tur niin, an chenna tur in a zatve (50%) sak zawh hunah Rs. 50,000 pek an ni ang a, in sak zawh hunah Rs. 75,000 pek leh tur a ni.

Bru chhungkua Mizorama lêtte chu Mizorama an rawn let thlaah chhawmdawlna (one time financial assistance) Rs. 4,00,000 chu chhungkaw lu ber hmingin fixed deposit-in kum 2 chhung dahsak an ni dawn a, Mizorama kum thum an chên hnuah sum chu pek chhuah chauh tur a ni. Rs. 4,00,000 bakah hian, kum hnih chhung thla tin Rs. 5,000 pek an ni dawn a, kum hnih chhung vêk a thlawnin ration pek an ni ang.

Bru hruai kir hna hi Mizoram sorkar ruahmanna anga kalpui tur a ni a, Mizoram an pannaa an senso (cost of transportation) chu Mizoram sorkar sum hman phawt tur niin, a hnuah Ministry of Home Affairs-in Mizoram sorkarah a rùl leh dawn a ni.