Cement man tihsan duh loh lantir nan Cement zuarte'n dâwr an khâr dawn

All Mizoram Cement Iron Rod Dealers' Association (AMCIRDA) chuan nimin khan Aizawl Press Club-ah thuthar thehdarhtute an kâwm a; cement company pathum - Dalmia, Star leh Topcem-te'n cement rate Mizoramah chauh an an tihsan duh loh lantir nan naktuk Nilaini hian Mizoram pumah dâwr an khâr dawn tih an puang.

AMCIRDA president PB Sangdingliana chuan, cement company pathumte'n rate an tisang chu an ngaihthiam loh thu sawiin, "June 30, 2018 khan tito lo turin ngenna kan lo thlen tawh a, amaherawhchu, vawiin thleng hian an rate tihniam turin hmalakna an nei lo," an ti.

PB Sangdingliana chuan, company-te karna atan an kudam an lo kalhsak tawh tih sawiin, "Kan kalhna chhu chhiain, an consignment and forwarding agent (C&F) -te hmangin mipuite hnenah rate toa hralh chhuak tura hma an la chhunzawm hi kan hrethiam lo," a ti a; cement company pathumte chuan Mizo mipuite hmakhua an ngai lo hle tih an sawi.

Dalmia, Star leh Topcem-te chu cement company lian an nih thu sawiin AMCIRDA President chuan, "Tunah hian rate tisang ve lo cement company dangte chu rate tisang ve turin an nawr mek. Chuvangin, tuna titote hian an tihniam lo a nih chuan Mizoram cement company zawng zawngte hi an rate tisang turin an inko reng a ni" a ti.

AMCIRDA hruaitute chuan, tun hma chuan fûrah cement man tihniamin, ṭhálah a man a sàn ṭhin thu sawiin, "Company pathumin fûr laia an rate an tihsan hi a kaltlang chuan cement rate hi Mizoramah a sang chhunzawm reng dawn a, ṭhálah chuan a sang leh zual tura ngaih a ni," an ti a; Mizo mipuite'n man tláwm zawka cement an lei theihna atan ṭanho a ṭul thu an sawi.

Cement man sang mah se, engahmah ngai loa lei mai zel Mizo zingah an tam thu sawiin AMCIRDA hruaitute chuan, "Company pathumte pawh hian an rate tisang mah se, lei hreh lo an awm a, hralhna tur an hmu reng. Chuvangin, mipuite kan ṭan rual a, sorkar pawh a inrawlh a ngai a ni," an ti a; Dalmia, Star leh Topcem company-te'n cement man an tihsanna anga leisak lo turin mipuite an ngen a ni.

AMCIRDA hruaitute chuan, cement rate chu to mah se, an zawrhna rate a to ve mai ṭhin thu sawiin, "Keini chu a tuartu kan ni lo. A tuartu ber chu mipui an nih avangin ṭha kan ti lo a ni. Dâwr kan khâr vanga mipuite'n harsatna an tawh lohna atan cement hmanga hnathawkte lo inhmakhua lâwk turin kan ngen a ni," an ti.