Library tur sak a ṭhat loh avangin Tlangpui YMA-in an luah duh lo

YMA, Tlangpui Branch chuan, Mizoram sorkar kaltlanga Rs. 10,00,000 sénga Tlangpui YMA Library building sak chu a sak a chhe hlea an ngaih avangin luah loh turin thutlukna an siam.

Tlangpui Branch YMA thuchhuak chuan Library building luah an duh loh chhan tarlangin, building chu Tuichâng South Block MNF president H Lalrozama hnuaiah Tlangpui MNF unit president C Lal­nghakliana, secretary Lalrinkhuma leh Tlangpui V/C vice president Vanlalnghaka ten an sak thu an tarlang a; "Estimate nena inmil lo takin an thawk a, a zau zawng ft. 18x12 niin, a ban leh beam cement hman a ni a, a bang tile, a chhuat thingphel, a chung rangva a ni," an ti.

Tlangpui YMA chuan, "Estimate nen a inmil loh em avangin YMA Branch Executive Committee chuan a chhûnga furniture ṭhenkhat tum turin kan ngen a, mahse, min tihpuitlinsak duh lo a ni," an ti a; vawi tam tak an ngen hnuah pawh tihhlawhtlin a nih loh avangin an beidawng a, building chu luah loh mai an rel ta tih an tarlang a ni.