World AIDS Day 2021 hman a ni HIV/AIDS doa kan ṭanrual a ngai - Health Minister

Mizoram State AIDS Control Society (MSACS) bultumin nimin khan Mizoramah World AIDS Day hman a ni. Aizawlah chuan zing karah World AIDS Day Rally buatsaih a ni a, a hmanpuitu Health minister Dr R Lalthangliana chuan, AIDS doa ṭanrual a ngaih thu a sawi.

Rally kharna inkhawm, Millennium Centre tuala neihah Dr R Lalthangliana chuan, Mizorama AIDS vanga thi tawh zawng zawng chhungte a tawrhpui thu a sawi a, "Mizorama he natna kai tharte hi a tlangpuiin kum 19-49 inkar an ni ber. A kái àwm rênga kan ngaih ṭhin, high risk group - ruihhlo bâwiha táng te, mipat hmeichhiat kawnga buan chak lote chauh ni loin, mipui náwlpuiah a thleng tawh a ni," a ti.

Health Minister chuan, HIV/AIDS donaah mi zawng zawngin ṭan an lak a ngaih thu sawiin, "MSACS hian amah maiin a bei thei lo a, NGO kan thawhpuite leh kohhran, khawtlangte nena kan ṭanho ṭhinna hi a hlu tak zet a ni," a ti a; AIDS veite thinhrik mai loa ngaihsak leh HIV/AIDS vei thar awm tawh lohna ram ni tura ṭanrual a ngaih thu a sawi.

HIV/AIDS chungchangah Mizoram vanneih bikna sawiin R Lalthangliana chuan, "Kan ṭhiante, kan unaute he natna veite hmangaihna leh lainatna kan nei a, an tana kan ṭawngtai ṭhin bakah a taka che chhuak ṭhin kan tam a ni," a ti.

Health Minister hian HIV veite'n an kai nite hmuh chhuah a nih a, HIV-a an dinhmun an hriat nan leh chak zawka hmalak a nih theihna tura NCDC leh MSACS-te'n 'Index Testing' an kalpuina tur programme a hawng nghal a ni.

Health secretary R Lalram-nghaka pawhin thu sawiin, Covid-19 nasa taka do a nih mek laiin HIV/AIDS dona a ṭhuanawp thiang lo tih a sawi a, "Kan dinhmun hi kan inhriat chian poh leh thla a muang lo. HIV/AIDS phei hi chu kan taksaah a hrik a luh tawh chuan tihdam theih loh a nih avang hian inven lam kan ngaih pawimawh lehzual a ngai a ni," a ti.

World AIDS Day hmanna inkhawmah hian AIDS Healthcare Foundation (AHF) hmalakna kaltlangin Aizawla taxi driver leh two wheeler taxi driver-te'n HIV/AIDS donaa an hman ṭangkai tur hmanrua - two-wheeler taxi driver tan jacket leh four wheeler taxi driver tan seat cover sem a ni.

World AIDS Day Rally-ah hian MSACS leh an thawhpui NGO hrang hrang bakah, mi ṭhahnemngaite an tel a; HIV/AIDS chungchanga inzitirna chi hrang hrang banner leh poster kengin, Vanapa Hall kawt aṭanga Millennium Centre thleng kawng an zawh a ni.