Krismas pual thisen pek rûnpui hawng

Association for Voluntary Blood Donation (AVBD), MSACS leh blood bank-te chuan nimin aṭang khan Mizorama blood bank hrang hrangah Krismas pual thisen pek rûnpui an huaihawt ṭan a; Krismas lawmna atan thisen pe turin Mizoram ṭhalaite an sáwm.

Krismas pual thisen pek rûnpui hi Aizawlah chuan Civil Hospital Blood Bank-ah Civil Hospital medical superintendent Dr Lalhmuchhuaka'n a hawng a; Dr Lalhmuchhuaka chuan, "Kan thil neih zawng zawnga hlu ber, kan thisen ngei kan pe thei hi a hlu tak zet a, hlim taka Krismas kan hman ṭheuh theih nan leh mi dang tana malsawmna ni turin thisen i pe ang u," a ti.

Hawnna inkhawm kaihruaitu AVBD president C Lalnunnema chuan, December leh January thla chu pawl hrang hrangte an buai thla a nih avangin thisen pek a tlem ṭhin tih sawiin, "Chutih laiin, rîkrum thil leh chetsualna thlengte avangin hunpui vuakvêt hi thisen mamawh a tam thla a ni," a ti a; chuvang chuan Krismas puala thisen pek rûnpui an huaihawt tih a sawi.

AVBD President sawi danin, kum 2018 aṭangin Aizawlah Krismas puala thisen pek an huaihawt ṭan a, kum 2020 aṭangin district danga blood bank-ahte pawh huaihawt ṭan a ni. Krismas puala thisen pek rûnpuiah hian kum 2018-ah thisen unit 568, kum 2019-ah unit 527 leh kum 2020-ah (blood bank hrang hrang) unit 1,942 pek a ni.

Thisen pek rûnpui hawnnaah hian AVBD dintute zinga mi, president hlui leh adviser ni mek Lalbiakthanga Pachuau hnenah Padma Shri a dawn avanga lawmpuina thilpek hlan a ni.

Krismas puala thisen pek rûnpui hawn ní-ah hian Aizawl Civil Hospital blood bank-ah chuan mimal 19-in thisen an pe a, district dangahte pawh hawnna inkhawm buatsaih niin, mi eng emaw zatin thisen an pe bawk. Thisen pek hian kumin December thla chhung a awh dawn a, thisen pete hnenah ei leh in tuihnái zawk hlui ṭhin a ni ang.