Civil Hospital-a emgergency service Tihchangtlun leh chei ṭhat hawn a ni

Civil Hospital, Aizawl (CHA)-a emergency service cheng nuai 45.2 vela tihchangtlun leh chei ṭhat chu nimin khan Health minister Dr R Lalthangliana'n a hawng.

Health Minister chuan, CHA chu Mizorama sorkar enkawl damdawi-in lian ber leh changtlung ber a nih avangin en rawn a hlawh thu a sawi a, "Refer hospital ang maiin hmun dang aṭanga rawn refer pawh an tam a, sawisel pawh kan hlawh hma. Thawktute pawh in hah a, in thawhrimna zarah rah duhawm tak kan hmu zel. Covid-19 lêng chungin rim takin hna in thawk a, a ropui hle a ni," a ti.

Trauma Centre din turin hna thawh ṭan a nih thu sawiin R Lalthangliana chuan, "Duh angin thil tih a chak thei lo a, chinfel ngai a tam. A rang thei ang bera zawh kan duh. Cheng vbc. 12 vel sênna tur a ni a, peih a nih hunah chuan department ṭhenkhat tâwt lutukte pawh sawn theih a nih a rinawm," a ti a; Trauma Centre peih a nih hunah damdawi-in a changtlun sawt tur thu a sawi.

Health Minister chuan, CHA-in hma a sawn zel thu sawiin, "CT scan, ultrasound, dialysis khawl, adt. ṭha zawk kan nei tawh a, tun hmaa ICU khum panga chiah nei ṭhin pawh tunah chuan khum 15 kan nei tawh. Kan damdawi-in a changtlun hian state páwna sum tam tak luang ral tur kan hum a ni. Thawktu 734 lak kan CM-in min phalsak mah se, hripui vangin kan ti leh thei lo a, lak theih thuai kan beisei," a ti.

Khualzahawm Health & Family Welfare Board vice chairman Dr ZR Thiamsanga, MLA chuan, khawpuia damdawi-inte’n hma an sawn thu sawiin, “Thingtlang lamah duh angin health service a la ṭha tawk lo a, a bikin primary health care-ah hmasawn a ngai,” a ti a; doctor, nurse leh health worker indaih lohna a nasat thu a sawi.

CHA medical superintendent Dr Lalhmuchhuaka chuan, mihring pung zelah duh thálin service an pe thei lo tih sawiin, “Mipui pawhin an khamkhawp lo emaw tih theiha kan awm chungin mualpho lutuk loin kan awm thei,” a ti.

Emergency service tihchangtlun leh chei ṭhat hawn rual hian CHA compound chhunga vantlang zun-in siam thar hawn nghal a ni a; zun-in siamna atan hian Baptist Church of Mizoram, Zotlang Pastor Bialin Rs. 4,20,000 an thawh a ni.