Mamit MJA-in department hmun tlawh

MJA, Mamit district member-te chuan November 30, Thawhlehni leh nimin khan Serchhip leh Thenzawl leh a chheh­vela Agriculture leh Horticulture department hmunhmate an tlawh.

Mamit MJA-te hian Thawhlehni khan Serchhip Agriculture Complex-ah ran chaw (vaimim) herna, tél herna leh dailuah hernate an tlawh a, Agriculture department hotute'n an hmalakna hrang hrang an hrilhfiah. Horticulture department-in Lengte rama Centre of Excellence an kalpui mek an tlawh leh a, Horticulture department demonstrator C Lalhmangaiha'n an hmalaknate a hrilhfiah a ni.

C Lalhmangaiha chuan, kum 2013 aṭanga Lengte rama hma an lak dan sawiin, "Kum 2015-ah hawn a ni a, cheng nuai 500 sénga bul ṭan a ni. He lai hmun hi hectare 4/5 vela zau a ni," a ti.

Mamit MJA-te hian Mat phai pawh an tlawh a; Serchhip Horticulture & Agriculture Cooperative Society chairman PC Siamliana chuan kumin a ruahsur avanga harsatna an tawhte hrilhin, hei vang hian kuminah zikhlum an thar tlem bakah, an thar tlai an rin thu a sawi.

Nimin khan Mamit MJA-te hian Thenzawla Agriculture department nursery an tlawh leh a ni.