Mizoram khawpui fai endik ṭan
Mizoram khawpui fai endikna chu nimin khan ṭan a ni a, endiktu turte chu nimin zing khan UDPA secretary K Lalthawmmawia’n UDPA directorate aṭangin a vailiam.
India ram puma faina lam inelna neih mekah Mizorama khawpui hran hrangte endik tur hian convener H Lianzela, UDPA director hoin official-te bakah pawl hrang hrang aṭangin panel of judges ruat a ni a, khaw hrang hrangah insem darhin an endik dawn a ni.
Khawpui fai intihsiaknaah hian UDPA department-in khawpuia a puan 28-te category pathumah ṭhen a ni a; Category I-ah Aizawl khawpui (AMC area) awmin, Category II-ah district khawpui 10-te a awm a, Category III-ah kawngpui dang 17-te a awm thung.
Category IlI-a awmte chu Vairengte, Tlabung, Kawnpui, Thenzawl, North Vanlaiphai, Darlawn, Zawlnuam, Biate, Khawhai, Sairang, Lengpui, Bairabi, West Phaileng, Kawrthah, Ngopa, Phullen leh Farkawnte a ni.
Khawpui fai endik tur hian UDPA department aiawh te, Mizoram University lama mi te, Central YMA aiawh te, MJA aiawh te, Mizoram Pollution Control Board aiawhte an tel a; pakhatnain Rs. 2,22,222, pahnihnain Rs. 1,11,111 leh pathumnain Rs. 77,777 an dawng dawn a; Januray 26, 2022, Republic Day-ah result puan a ni ang.
Swachh Bharat Mission hnuaiah kum tin ram pum huap khawpui fai endikna kalpui ṭhin Swachh Survekshan hmangin kum 2017 aṭangin UDPA department chuan khawpui fai inelna a buatsaih ṭhin a ni.