KHAWTHLIR

Thisen pe
CZ Higher Secondary School NSS chuan nimin khan Kolasib District Hospital-ah thisen unit 24 an pe a, petute mipa 13 leh hmeichhia 11 an ni. BN College of Nursing Red Ribbon Club pawhin nimin khan Civil Hospital, Aizawl blood bank-ah thisen unit 21 an pe a, petute hmeichhia 16 leh mipa panga an ni.

SBI-in CYMA pe
State Bank of India chuan corporate social responsibility (CSR) aṭangin nimin khan Central YMA hnuaia training centre-a hman turin dawhkân 25, ṭhutthleng 25 leh computer an pe a; SBI general manager Lunkim Thangboi-in CYMA hruaitute hnenah a hlan.

Sainik School tlawh
Serchhip bawrhsap Kumar Abhishek chuan nimin khan Chhingchhipa Sainik School a tlawh a, biology laboratory a hawng. Sainik School-ah hian zirlai cadet 296 an awm a, officer pahnih leh thawktu dang mi 40 an awm a ni.

Páwn chhuah khap
Reiek khuaah tun hnaiah Covid-19 vei thar eng emaw zat hmuh chhuah a nih avang leh hri an veina chhui mai theih a nih loh avangin West Phaileng sub-divisional magistrate H Lalramliana chuan Reiek khaw chhungah zan dar 6 aṭanga zing dar 4 inkarah páwna chhuah khapna thupek a tichhuak.

Pipe phúm dawn
SIPMIU-in vawiin aṭangin Ṭhuampuia MULCO Office aṭanga Falkland Veng péng inkar kawngah ni tin zing dar 9 aṭanga zan dar 8 thleng pipe an phûm dawn a, kawng hmangtute chu fimkhur tak leh hna thawktute ngaichang chunga lirthei khalh turin hriattir an ni.

MLA-in enfiah
Lengteng bialtu MLA L Thangmawia chuan October 30 khan a bial chhunga hmasawnna hna thawh - Saitual leh Saichal inkar kawng blacktop hna an thawh mek te, Pàwlráng khuaa MLA fund hmanga Primary School building sak mekte leh a bial leh Champhai North inkalpawhna tur Hliappui-Aiduzawl inkar kawng MLA fund hmanga laih mekte a tlawh.