YMA khawmpui neih phalsak

Mizoram sorkar chuan December 16, 2021-ah YMA General Conference neih a phalsak a; chutih rualin, conference-ah Covid-19 vaccine la kim tawhte chauh kaltir tur te, conference neihnaa ṭhutna awm zat zatve aia tam pung khawm lo tur leh hripui laka invennate zâwm turin a chah.

YMA General Confe-rence chungchangah hian Disaster Management & Rehabilitation (DMR) under secretary Lalbiakfela chuan November 30, 2021 khan Central YMA General Secretary hnenah lehkha thawnin, Covid-19 léng mek avangin YMA General Conference neih phalsak an nih loh thu a hriattir a ni.

DMR Under Secretary lehkhaah chuan, "State Level Expert Team on Covid-19 Management ngaihdante zawh a nih hnu leh Covid-19 hripui Mizorama a pun mek dan ngaihtuah hnuah hetianga mipui tam tak punkhawm hi remchang rih lovin sorkar chuan a hria a. Hripui dinhmunin ziaawm lam a pan deuh hun remchang nghak hrih mai turin ka ngen a che u," tia ziah a ni.

Hetih lai hian, CYMA hnena lehkha thawntu DMR under secretary Lalbiakfela chu Siaha election officer leh SDO (Sadar) mawhphurhna la tura tih a ni a, November 30, 2021 vek khan DPAR secretary K Lalthawmmawia'n thupek (notification) a tichhuak. Lalbiakfela hian Siahaah hian maternity leave latu Lalnunmawii a thlak ang.

November 30, 2021-ah YMA General Conference neih remtihsak a ni rih lohna tura hriattirna tihchhuah a nih tuk, nimin December 1, 2021 khan DMR secretary Vanlalngaihsaka chuan December 16, 2021-ah YMA General Conference hman phalsakna thupek (order) a tichhuak ve leh a ni.