Jail-a táng thi chhungte hnenah Zángnadawma pe turin hriattir

National Human Right Commission (NHRC) chuan November 1, 2018-a Kolasib District Jail-a táng damlo thihna chu jail thuneitute inthlahdah vangah puhin, zangnadawmna Rs. 3,00,000 chawi turin a hriattir.

NHRC aṭanga Mizoram sorkarin thu a dawn danin, Kolasib District Jail-a táng Lalropuia s/o RL Roliana, Thingdawl chu MLTP Act vanga man niin, District Jail-ah dah a ni. October 31, 2018 zingah lu ná avangin a insawisel ṭan a, chawhnu lamah a pum a dik loh thu jail thawktute hnenah a thlen a; a ná a ziaawm theih loh vangin zan dar 11:25-ah Kolasib District Hospital-ah hruai a ni. Damdawi-inah admit a ni a, mahse, November 1, 2018 zing lam dar 2-ah a ná tuar loin a thi a ni.

Lalropuia thih danah hian NHRC chuan thil felhlel a awm nia hriain, Mizoram sorkar chu insawifiah turin a hriattir a; sorkar a insawifiah mai loh avangin zangnadawmna Rs. 3,00,000 an pek lohna chhan tur sawifiah turin hriattir leh bawk.

Mizoram sorkar chuan Covid-19 léng chhuanlamah hmangin, hun pek belh an nih hnuah an insawithiamna chu NHRC chuan pawm loin, jail-a doctor ràwn tur awm lo leh nurse-in damdawi satliah a chawh chu jail thuneitute mawhphurhnaah a ngai a ni.

NHRC chuan Kolasib District Jail thuneitute chu chawlhkar ruk chhungin Lalropuia chhungte hnenah zangnadawmna Rs. 3,00,000 pe tur leh, an pe ngei a ni tih finfiahna document chawlhkar ruk chhunga NHRC-a pe turin a hriattir a ni.