COVID-19: Mizoram dinhmun ; Hripui vei 365 hmuh belh a ni

November 30, Thawhlehni khan Mizoramah Covid-19 vei mi 365 hmuh chhuah a ni. Nimin khan hripui vei dam tawh mi 250 chhuahtir an ni a, Covid-19 vangin mi pahnih an thi.

Covid-19 vei hmuh thar mi 365-te chu mipa 171 leh hmeichhia 194 an ni a; ZMC laboratory-a hmuh chhuah 36, TrueNAT hmanga hmuh 29, RAT hmanga hmuh 295 leh FIA hmanga hmuh panga an ni.

IDSP record angin, Mizoramah Covid-19 vei 1,35,175 hmuh chhuah a ni tawh a, mipa 65,301 leh hmeichhia 69,874 an ni a, mipa aiin hmeichhia 4,573-in an tam zawk. Nimin tlai dar 5 thleng khan mi 1,31,177 (97.04%) chhuahtir an ni tawh a, mi 500 (0.37%) thi tawhin, enkawl mek mi 3,498 (2.59%) an awm.

November 30, Thawhlehnia Covid-19 vei hmuh thar mi 365 zingah symptom nei mi 249 an awm a, mi 116 erawh chuan symptom an nei lo.

Thawhlehnia swab sample endikah district pangaah positivity rate 10% chung lam a ni a, positivity rate sanna ber Serchhip district-ah 33.04% a tling. Positivity rate 10% chung lam dangte chu - Champhai 14.10%, Mamit 14.02%, Siaha 13.45% leh Hnahthial 13.29% a ni.

Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. November 2021 thlenga swab sample endik tawh 14,33,147 aṭanga RT-PCR hmanga endik zat percentage chu 22.62 a ni a, RAT hmanga endik zat chu 71.47% a tling.

Kum 2011 chhiarpui aṭanga chhûtin, Mizorama Covid-19 vei hmuh tawh 1,35,175 chu mi 1,000 zelah hripui vei mi 123 an awm ang a ni a; mi 1,00,000 zela Covid-19 vangin mi 45 an thi tawh ang a ni tih sorkar thuchhuakin a tarlang.

Nimin khan tlai dar 5 thlengin hripui vei dam tawh mi 250 chhuahtir an ni a; Aizawl district-ah mi 104, Lunglei district-ah 85, Mamit district-ah 26, Kolasib district-ah 14, Hnahthial district-ah 12, Champhai district-ah paruk leh Saitual district-ah mi pathum an chhuak a ni.