Covid-19 hripui do karah AIDS do Hlamchhiah loh a ṭul - AHF

AIDS donaa hma latu AIDS Healthcare Foundation (AHF) hruaitute chuan nimin khan Hotel Floria-ah thuthar thehdarhtute an kâwm a; Covid-19 léng karah HIV/AIDS do hlamchhiah loh a ṭul a thu an sawi.

AHF country program director Dr V Sam Prasad chuan, Mizoram chu thisen endik aṭanga chhûta India rama HIV/AIDS vei tamna ber a nih thu a sawi a, "Mizoram hi puih a ngai a, health system hrang hrangah puih kan tum. Health Minister pawh kan be tawh a, a inhawng hle. Tunah hian Mizoram hi engtin nge kan puih theih ang tih rawn zir chiang turin kan lo kal a ni," a ti.

Dr V Sam Prasad chuan, Covid-19 lèn hnuah AIDS doin hlamchhiah a hlawh thu sawiin, "Mithiamte pawhin Covid-19 ah ringawt rilru an pe a ni. Testing tihtlem a ni a, ART centre-te khâr niin, a damdawi ngaihtuah kawnga research tihte pawh ngaihthah a ni," a ti a; HIV/AIDS ngaihven a nih lehna atana ṭan an lak dawn thu a sawi.

Zawhna chhangin Dr V Sam Prasad chuan, kum 2018-a condom campaign an kalpui ṭan tirhin Mizoramah kohhran hruaitute aṭangin dodalna a awm deuh thu sawiin, "Kan hrilhfiah a, meeting kan neihpui. Kohhran hian engtikah mah condom hman an tlangaupui dawn lo a, mahse, min hrethiam viau tawh. An hnen aṭangin harsatna kan tâwk tawh lo," a ti.