RD department-in inhlawhna sawifiah

Rural Development (RD) department chuan thuchhuah siamin, ni 100 inhlawhna (MGNREGS) aṭanga mipui hlawh tur sum chu Mizoram sorkarin a tihtàn ngai loh thu leh sorkar laipui aṭanga sum sanction a nih rualin mipui account-ah direct-a thun nghal zel a nih thu a tarlang.

RD department tarlan danin, RD minister Lalruatkima hmalaknain sorkar laipuiin MGNREGS hnuaia inhlawhna sum a rawn pe chhuak thuai dawn a, thingtlang mipui chî-âi lo turin an ngen a ni.

RD department chuan, “MGNREGS hnuaia mipui inhlawhna tur sum (wage component fund) hi direct benefit transfer-in Ministry of Rural Development aṭangin MGNREGS hnuaia inhlawh, mipui hnenah pek ṭhin a ni. MoRD-in labour budget a rawn approve angin inhlawhna kalpui a ni a, thingtlang mipui inhlawhna pawh Mizoram sorkar RD department chuan fund transfer order hmangin MIS-ah an siamsak nghal zel. Hemi mil hian MoRD-in fund a rawn sanction ṭhin a, mipui inhlawhna wage component bik hi Mizoram sorkarin a tihtânsak ngai lo. Sorkar laipuiin an rawn sanction rualin mipui account-ah direct-in a thun nghal zel a ni,” a ti.