Lirthei intlân chhâwk dan tur tichhuak

2nd December, 2021

Aizawl Traffic additional SP C Vanlalvena chuan nimin khan December 1, 2021 aṭanga January 15, 2022 zanlai dar 12 thlenga Aizawla lirthei intlàn chhâwk dan tur a tichhuak. Intlân chhâwk hian zing dar 9:30 aṭanga tlai dar 5 thleng a huam dawn.

Lirthei intlàn chhâwk hian mimal, sorkar leh bungraw phur lirthei zawng zawng a huam a, district dang lirthei leh state páwna lirthei register-te pawh a huam. Inrinni, Pathianni leh sorkar holiday-ah lirthei zawng zawng tlân theih a ni. Zan lam curfew hun, zan dar 9 aṭanga zing dar 4 inkarah phalna nei lo lirthei tlan phal a ni lo.

Lirtheiah registration-a chuang thei zat (seating capacity) tarlan aia tam chuan phal a ni lo a, hmai tuam reng tur a ni. Lirthei khalhtute'n passenger-te hman tur hand sanitizer an pai reng tur a ni bawk.

Thupek zâwmlote chu MV Act Section 179, 1988 leh Section 5(9) of The Mizoram (Containment and Prevention of the Spread of Covid-19) Act, 2020 hmanga hrem theih an ni.

Taxi-te chu anmahni'n intlân chhâwk dan an hman mek angin zing dar 9 aṭanga tlai dar 6 inkarah an intlân chhâwk ang a, Inrinni bikah chawhnu dar 1 hnu lam leh Pathianni leh sorkar holiday-ah an vaiin an tlân thei.

Two wheeler taxi chu sticker A, B, C, D leh E hmanga an tlân dan tur (routine) siam angin ni khatah group pathum an tlân thei dawn a, zing dar 9 aṭanga tlai dar 6 inkarah an intlân chhâwk ang. City bus-te chu Aizawl City Bus Owners Association-in routine an siam angin an tlân dawn a ni.

Intlân chhâwkin a huam lohte
1. Governor, Chief Minister, Speaker (an carcade tiamin) leh MLA-te
2. Gauhati High Court judge
3. Police, Fire & Emergency Services, MRHGCD, Prisons, FSL, Excise & Narcotics duty
4. Medical & Hospital emergency duty
5. PHE/PWD/P&E emergency duty, PHE tuisem
6. Ambulance/morgue van
7. Executive magistrate law & order duty
8. Print & electronic media-a thawk
9. Army leh para-military force
10. Sorkar despatch rider
11. AMC hnuaia bawlhhlawh paih motor
12. Rualbanlote tana special vehicle
13. Bawnghnute leh chanchinbu sem
14. Kohhran hminga lirthei register

Intlân chhâwk dan tur
Tlân loh ní Reg.No
Thawhṭanni 1 & 2
Thawhlehni 3 & 4
Nilaini 5 & 6
Ningani 7 & 8
Zirtawpni 9 & 0