KHAWTHLIR

Award dawng
18th. National Fish Farmer Day 2018 leh Silver Jubilee, College of Fisheries, Central Agriculture University (Imphal), Tripura lawmna inkhawm, Tripura-a nimina buatsaihah Hmangaihthanga, Serchhip Zozam Veng chuan North East Best Fish Farmer Award a dawng. Hmangaihthanga hian sangha dil pariat (hectare 3.5) a nei a, kuminah sangha quintal 20 a thar thei a ni.

Art Workshop
IPR department leh Mizoram Art Development Society (MADS) ṭangkawp chuan nimin khan Archive Hall, Aizawlah Art Workshop 2018 an buatsaih a, IPR joint director Lallianpuii'n a hawng. Workshop-ah hian mi 51-te thil ziah leh siam pho chhuah a ni a, July 13 thleng a awh ang.

Graduation Day
Champhai College chuan nimin khan an multipurpose hall-ah Freshers’ Social leh Graduation Day an hmang a, Champhai North bialtu MLA TT Zothansanga'n a hmanpui. Champhai College aṭang hian 6th semester-ah zirlai 115 exam in, 60.87%-in an pass a ni.

Ui seh a tam
Aizawl Civil Hospital (ACH) hotute chuan, tun hnaiah uiin a seh vanga ACH Casualty pantu leh injection la an tam thu an sawi. An sawi danin, kumin May thla chhung khan ui seh vanga ACH casualty pantu mi 195 an awm a, mipa 114 leh hmeichhia 81 an ni. June 2018 chhung khan uiin a seh vanga ACH casualty pantu mipa 75 leh hmeichhia 62, an vaiin mi 137 an awm bawk. ACH hotute chuan, mi sehtu uite chu stray dog ni loin, pet dog an nih tlangpui thu an sawi.

Scooty-in su hlum
Saitual College-a associate professor Lalhmangaihzuala (57), Saitual chu July 9, Thawhṭanni tlai dar 5 vel khan hmeichhe naupang kum tling lo khalh scooty-in Saitual Dawrkawna a kal lai hnung lam aṭangin a sû a, Aizawl panpui a nih laiin zan dar 8 velah Selingah a hliam tuar loin a thi. Scooty-ah hian kumtling lo pathum an chuang a ni.