Hripui vei mi panga hmuh belh Mipui nawlpuiah a la darh loa ngaih a ni
June 14, Pathiannia Zoram Medical College (ZMC) Covid-19 Laboratory-a swab sample 600 chuang endik zinga mi pangain Covid-19 hripui an vei tih hmuhchhuah a ni. Hetih lai hian, mipui vantlanga hripui darh hlauhthawnawm zinga mi, Edenthar Veng, Mission Veng leh Aizawl Hospital & Research Centre-a mi eng emaw zatte chu hripui lakah an fihlîm a; mipui nawlpuiah a la darh (community spread) loa ngaih a ni.
SRH-ZMC Covid-19 Bulletin tarlan danin, Pathianni khan ZMC Laboratory-ah mi 682-te swab sample endik a ni a, chu'ng zinga mi pangate chuan Covid-19 an vei tih hmuh chhuah a ni.
Pathiannia sample endikte hi ZMC-a awm sate bakah, Aizawl, Mamit, Siaha leh Hnahthial district aṭanga sample dawnte a ni.
June 14, Pathiannia swab sample endik zingah Aizawl Hospital-a thawk mi 29-te leh Mission Venga mi 34-te an tel a, Covid-19 an kai lo tih finfiah a nih thu, Mission Veng Local Task Force chuan nimin khan an puang. Heng mi 63-te hi Mission Veng pa pakhat, June 12, 2020-a Covid-19 vei hmuh chhuahin direct contact a neihpui leh hripui a kai chhàwn palh theiha ngaihte an ni.
Aizawl Hospital & Research Centre chuan nimin khan thuchhuah siam nghalin, an damdawi-ina thawk mi 29-te hripui laka an fihlim tâk avangin Aizawl Hospital chu nimin aṭangin mipui tan an hawn leh nghal thu an tarlang a, "OPD, emergency, laboratory test leh pharmacy-te a ngai anga kalpui lehnghal a ni," an ti.
Tun hnaia Covid-19 vei hnam dang pakhat phurtu, Edenthar Venga Pik-up driver pakhat leh a chhungte pawh nimin khan an swab sample test result a chhuak a, hripui an kai lo vek tih hmuh a ni.
Tarlan tawh angin, Pik-up driver leh a chhungte hi fimkhur thilah home quarantine nghal an ni a, Covid-19 an kai lo tih finfiah a nih tak avangin home quarantine an ni tawh lo.
June 14-a Covid-19 vei hmuh chhuah thar pangate hi Delhiaṭanga tun hnaia rawn haw, Mamit district mite vek, West Phailenga quarantine facility-a awm laite an ni a, hmeichhia vek niin kum 21-23 inkar an ni. Nimin khan Mamita Covid Care Centre (CCC)-a enkawl turin hruai nghal an ni.
Heti hian Mizorama Covid-19 vei tawh zawng zawng chu mi 117 an ni a, mipa 58 leh hmeichhia 59 an ni. An zinga mi 116 chu June 1-14 chhunga vei hmuh chhuah an ni a; March 24, 2020-a hmuh chhuah pakhat erawh chu a dam tawh thung.
Nimin lamah State Referral Hospital (SRH)-ah Covid-19 vei dah luh thar an awm lo a; rinhlelh thilah mi pasarih dah luh an ni thung.