MSU-in graduate topper-te an chawimawi

Mizo Students Union (MSU) chuan nimin khan Vanapa Hall-ah Mizoram University hnuaia graduate topper-te chawimawina hun an buatsaih. Khuallian, Home minister R Lalzirliana chuan, Mizoram chu ropui taka a awm theih nan ṭan tlan a pawimawh thu a sawi.

R Lalzirliana chuan, ni tin nunah politics a pawimawh thu sawiin, "Sorkar angin state ngainat­awm siam kan tumnaah hlawhtling mah ila, state páwna hnathawk kan tlem ta hi ngaihtuahna sên a ngai. Mizoram hi India ram bung hrang tê tak tê ni mah se, ropui taka kan awm theih nan lungrual taka kan ṭan tlan a pawimawh hle," a ti.

Zirna leh lehkhabu piah lamah eizawnna a awm tel tih hriat a pawimawh tih sawiin R Lalzir­liana chuan, "Lehkha thiamnain a ken tel chu Mizo kan nihna kan hlut leh zual hi a ni," a ti a; zirlai chawimawina dawngtute chu lehkhathiam ni zel turin leh nu leh pate chhawmdawl kawngah theih­tawp chhuah turin duhsakna a hlan.

Khualzahawm, minister of state Vanlalawmpuii Chawngthu pawhin thu sawiin, hlawhtlinna chang turin harsatna tam tak paltlang a ngaih thu a sawi a, "Tuna hlawhtlinna hi a bul ṭanna chauh a ni," a ti.

MZU graduate topper 24 zingah hian Pachhunga University College aṭangin zirlai 14, Hrangbana College aṭangin zirlai pali, Zirtiri Residential Science College aṭangin zirlai pa­hnih, Govt. Aizawl College, Mamit College leh Lunglei College aṭangin zirlai pakhat ṭheuh an lang a ni.