YMA Day lawm theih a ni lo Branch ṭhenkhat midangte tan luang chhuak
Nimin, June 15 kha Young Mizo Association (YMA) din champha vawi 85-na a ni a; Covid-19 hripui léng vangin kum dang angin lawm theih a ni lo. YMA branch tam tak chuan mi dang ṭanpuina atan an hmang thung.
Central YMA president Vanlalruata chuan nimin chhun dar 12 khan CYMA pisa tualah YMA flag a pawt pharh a, inkhawm hranpa a awm lo. YMA sub-headquarters, group leh branch-te pawhin an khua/vengah YMA flag an tár a ni a, khawlaia YMA flag tê tam tham tak tár an awm bawk.
YMA Day pual hian YMA branch eng emaw zat chuan thisen an pek bakah, mi dangte ṭanpuina atan hun an hmang a; ram hruaitu ṭhenkhat chuan YMA branch-te thilpek an pe a ni. Veng ṭhenkhat chuan information mike hmangin YMA hruaitute'n thuchah an sawi.
Central YMA chuan thuchhuah hmangin, tlang hrang hranga YMA member te, ramri venhim hna thawktu te, task force-a ṭhahnemngai taka thawktu te, thawktu indaih lohna vanga thawktute pui tura inpe YMA member-te leh hripui dona kawnga thawktu zawng zawngte duhsakna chibai an bûk.
YMA Day pual hian Armed Veng Branch YMA chuan Covid-19 vanga ramria duty mek Záwlpui, Luimawi, Phainuam leh Saihapui-V branch YMA-te hnenah Rs. 30,000 ṭheuh an hlân. Mimbung Branch YMA chuan an huam chhunga mi pakhat in tur an saksak a, bialtu MLA L Thangmawia'n rangva leh tile a tum.
Bairabi South Branch YMA chuan an huam chhunga YMA member, Covid-19 hripui darh zel lohna tura Bairabi South LTF hnuaia chhun zan zawma duty ṭhinte awmna chhungkuate hnenah buhfai an sem. Buhfai hi in 247-ah kg. 10 ṭheuh sem a ni a, chhungkaw pali hnenah ṭanpuina an pe bawk.
Sazep Branch YMA chuan Covid-19 vanga in sak chhunzawm thei lo chhungkaw pahnih in an sa chhunzawm. Sazep khua hian inkharkhip ṭan tirh aṭangin an khuaah lut leh chhuak an awm an phal lo. Khaw ṭhenkhat chuan fehpui ngaite an fehpui thung.
Kolasib bialtu MLA K Lalrinliana chuan YMA Day pualin a bial chhunga YMA leh MUP branch hrang hrang hnenah parachute, hmai tuamna leh hand sanitizer a pe. Aizawl East-II bialtu MLA Robert Romawia pawhin a bial chhunga branch YMA pasarih hnenah Rs. 10,000 ṭheuh a pek bakah, Chhinga Veng Branch YMA-te'n mi dangte ṭanpuina atana an hmalakna puihna atan Rs. 20,000 a thawh bawk.
YMA-ah hian branch 805, group 48 leh sub-headquarters panga a awm a; member mipa 2,63,649 leh hmeichhia 1,82,974, an vaiin 4,46,623 an awm mek a ni.