Mizoramah industry 9,067 a awm Industry hmuh chhuah zawh loh a tam

Industry anga inziak lut zingah hmuh chhuah zawh loh a tam thu sawiin Commerce & Industries hotute chuan, "YMA leh VC kaltlangin kan endik fo a, a ṭhen chu an vengte pawhin an hriat lohte niin, hetiang hi khawpuiah an tam ber. Kan trade neih list hmangin industry an din a, ṭhat hmel deuhin an rawn ti phawt a, Mizorama la siam ngai lohte pawh siam tur angtein an insawi a, Interview Board-ah pawh ram pek chungchangte thlengin an rawn sawi. Mahse, kan endik a, a lem a awm fo a ni," an ti.

  

Ram pek chung­changah, "Industry ram pekah hian, 'Pek an nih aṭanga thla rukah kut an thlak tur a ni,' tih te, 'Kum hnih hnuah thil an siam chhuak tur a ni,' tihte a awm," an ti a; industry nei anga insawi tam takin bank loan lak nan te, telephone connection neih hma nante leh Central aṭanga scheme dil nante an inziak lut hlawm niin an sawi.

Commerce & Indus­tries department hian The Mizoram Indus­trial Policy, 2012 an en ṭha mek a, an zo ṭêp tawh. Central subsidy hnuaiah - North East Industrial Development Scheme 2016 a awm a, chu chuan damdawi-in te, industry-a hmanraw mamawh leh khawl leina turte ṭanpui­nate a huam a ni.

Commerce & Indus­tries chuan tun hnai khan Covid-19 lockdown kaihhnawihah leh hri léng reh huna SDEP kalpui hun atan a ṭangkai beiseiin Mizorama industry neitute zingah zawhna chi hrang hrang an zâwt a; chhànna a lut ṭha lo a, industry neitu mi 634 chauhin an chháng tawh. Thingtlang kilkhâwr zawk, online-a chhàn harsate leh online ngai mang lote pawh an awm thei tih an hriat thu an sawi.

Zawhna te chu - lockdown sawhkhâwk (sum chungchang) te, hmanraw chungchang (raw material) te, thawktute (employment) chung­chang te, immigrant worker, Covid-19 lên tawh loh hnua an awm dan tur, lockdown tàwp hnu atana ruahmanna siam dan, Covid-19 vanga thil ṭha zawk thleng thei (lockdown challenge)-te leh sorkar aṭanga puihna an dawn tawh leh tawh loh chung­changte a ni.

Mizoramah industry chi hrang hrang 9,067 a awm mek anga chhin­chhiah a ni a, chutih laiin, industry zinga eng emaw zat chu a lem, a awmna venga mite pawhin an hriat loh a ni thung. Hetih lai hian, The Mizoram Industrial Policy, 2012 en ṭhat mek a ni a, zawh ṭêp a ni tawh.

Vanglaini palai zawhna chhangin Commerce & Industries department hotute chuan, Mizoram sorkara inziak lut industry 9,067 a awm mek laiin, rintlak erawh an tam lo tih an sawi a; industry chhinchhiah zingah tui zui lo te, trade thlang fuh lo te, hmanraw mamawh nei ṭha tâwk lo te, an trade thlana thiamna nei lêm lote eng emaw zat an awm avangin hlawhchham an tam phah niin an sawi.

Tun hma chuan industry tan Enterpreneur Memorundum hnuaiah sorkara inziah luh dan chi hnih a awm a; pakhat zawk - provisional (lifetime) chu tih thar zel theih niin, pakhat dang - EM 2/parmanent chu renew ngai lo, nung reng chi a ni.

Sorkara industry inziah luh theihna chi hnih­te chu May 12, 2006-ah sorkar laipuiin Udyog Aadhar Memorundum tiin an thlak tih sawiin department hotute chuan, "Central kaih­hruaina ang­in kan kalpui a, online-a inziah luh theih a nih avangin inziak lut an tam. Hma kan la dawn a, rin ngam si loh an tam hle bawk," an ti.