Sikul kal ṭan hun turah MHRD ngaihchàn a ni

Mizoram sorkar chuan, kum 2020-21 atana sikul kal ṭan hun turah Ministry of Human Resources Development (MHRD) thu chhuak a ngaichâng mek. Tun dinhmunah chuan, MHRD hian August 15, 2020 hma chuan sikul ṭan a remti lo.

School Education Minister hoa June 3, 2020-a Mizoram sorkar hotute ṭhukhawm chuan, Mizorama sikul kai ṭan hun atan July 15, 2020 an ruat a; ram dinhmun en chungin elementary (pawl 8 hnuai lam) lam luh hun tur chu ngaihtuah ṭhat leh theih tura dah a ni. Sikul kai ṭan hun tura ruat July 15-ah chuan quarantine centre atana hman sikulte pawh naupang kalna tlâka tihthianghlim hman beisei a ni.

Vanglaini palai zawhna chhangin School Education secretary Esther Lalruatkimi chuan, MHRD-in sikul kal chungchangah guideline-te an siam tur thu an rawn sawi tawh tih a sawi a, "Guideline min la thawn lo a, min thawn hunah sikul kai hun tur chungchang hi ngaihtuah a ni ang," a ti.