Mizoram sorkarin ILP pêk a phal hnuah Temporary ILP-in mi 18 rawn lut tawh

Mizoram sorkarin India mi, hnam dangte hnenah temporary Inner Line Permit (ILP) pek a phal hnuah mi 18 hnenah ILP pek a ni tawh. Home department chuan June 6, 2020 ṭang khan temporary ILP pek a phal a ni.

Vanglaini thu dawn danin, temporary ILP hmang hian Lengpui Airport aṭangin hnam dang pahnih, Vairengte kaltlangin mi 16 an rawn lut tawh a; Bairabi leh Zawlnuam kaltlanga rawn lut an la awm lo. Temporary ILP hmanga rawn lûtte chu Mizoram sorkar dan angin khung hran (quarantine) vek phawt tur a ni a, chumi hnuah an kalna tur hmunah an kal thei ang.

State páwn aṭanga hnam dang rawn lutte chu Lengpui Airport leh Vairengte an thlenin an hriselna dinhmun enfiahsak an ni a, Vai­rengte aṭanga rawn lutte chu R Dengṭhuama Hall pan tura tih an ni a, airport aṭanga rawn lutte chu home/hotel quarantine tura tih an ni thung.

Temporary ILP hmanga rawn lut zinga mi 17 chu oil leh gas company-a thawk an ni a, pakhat chu mi awmpui a ni thung. Temporary ILP hi Delhi-a Mizoram sorkar Resident Commissioner (RC), Kolkata-a Joint RC, Guwahati/Mumbai/Shillong/Silchar-a deputy RC, Vairengte SDO (Civil), Bairabi SDC, Lengpui Airport-a Dy. SP (Security) leh Kanhmun Police Station-a OC-te'n an pe thei a ni.

Home department chuan June 6, 2020 khan hriattirna (notification) chhuahin, Home depart­ment-in Mizoram state páwn aṭanga Mizoram luh phalna a lo pek tawhte hnena temporary Inner Line Permit (ILP) pe theitu tur a tarlang.

Notification-a a lan danin, temporary ILP rei zawng leh pekna chhante chu August 13, 2014-a Home department-in a tihchhuah tawh 'Guidelines for the en­forcement of the Inner Line Regulation in Mizoram' leh April 27, 2015-a notification-in a tarlan ang a ni.

Hetihlai hian online-a temporary ILP dilna chu khàr chhunzawm a la ni thung a; DC-te'n temporary ILP pawhsei emaw, ILP pangngai/temporary stay permit emaw chu pek theih chin tarlante hnenah chauh an chàm rei dan tur azirin an pe thei a ni.