Kawng chhâwng siam dan tur CM-in Union Minister a sawipui

New Delhi-a sorkar laipui hotute dàwra zin chief minister Zoramthanga chuan December 1, Nilaini tlai khan Housing and Urban Affairs leh Petroleum and Natural Gas minister Hardeep Singh Puri a kâwm a, Aizawla kawng chhâwng siam chungchang a sawipui.

Mizoram sorkar thuchhuah tarlan danin, Chief Minister leh Union Minister hian kawng chhâwng (elevated road) chungchang an sawi dun a; Aizawl tihchangkanna tura sorkar laipui project kal mek Smart City fund aṭanga siam rem theih dan a awm a nih chuan Smart City project hnuaia sum chu kawng chhâwng siam nan hman an phal thu Union Minister chuan a sawi.

CM Zoramthanga hian Hardeep Singh Puri hnenah Bawngkawn leh Vaivakawna fly-over leh Chaltlanga bus terminal siam tur chungchang a thlen bawk a; Union Minister chuan, DPR siamna atan cheng nuai 61 a pek tur thu hrilhin, DPR buatsaih nghal turin thurawn a pe a ni.

Bawngkawn leh Vaivakawna fly-over leh Chaltlanga bus terminal siamte hi sorkar laipui chuan a thuphung (in principle)-in a lo pawm tawh a; chumi zawhah a hmunhmate zir chiang a, feasibility report siam tura sorkar laipuiin a hriattir pawh ṭha taka peihin central-ah thehluh tawh a ni tih sorkar thuchhuahin a tarlang.

Oil and Natural Gas Corporation (ONGC)-in Meidum bula tuialhthei leh gas zawn nan lei an verh chhunzawm zelna chungchang pawh Chief Minister chuan a sawi a; Union Minister chuan ONGC chu a rang thei ang bera lei verh hna chhunzawm tura a lo hrilh tur thu a sawi.

Nilaini vek khan CM Zoramthanga hian National Security adviser Ajit Doval pawh a chenna inah a hmu a, state venhimna chungchang leh hmarchhak politics boruak an sawi dun a ni.