Lungleiah RTPCR dah tum a ni Beisei angin test a la tam thei lo - Health Minister

Health & Family Welfare minister Dr R Lalthangliana chuan, Covid-19 kai leh kai loh endikna atan Mizoram chhim lam tan Lungleiah swab sample endikna RTPCR dah tum a nih thu a sawi a, "ZMC-ah khawl thar dah ni mah se, duh anga hman thiam a la nih loh avangin beisei angin test a la tam thei lo," a ti.

Nimina veng hrang hranga community quarantine facility (CQF) a tlawhnaah Health Minister chuan, National Health Mission (NHM) aṭanga RTPCR lei chu Lungleiah dah tum a nih thu sawiin, "Kháwl thar hi a rawn thlen thuai beisei a ni. RTPCR khawl hi páwng dah ngawt theih a ni lo a, bio safety level cabinet a ngai a, hei hi Lunglei Civil Hospital-ah tih theih rin a ni," a ti a; Lunglei Civil Hospital chu enfiah turin nimin khan mithiam pathum Aizawl aṭanga tirh a nih thu a sawi.

Dr R Lalthangliana chuan, RTPCR awm mah se, hman nghal mai theih a ni lo tih sawiin, "Indian Council of Medical Research (ICMR) phalna a ngai dawn. ZMC-a mi kha chu lockdown lai a nih avangin video hmangin a hmunhmá kan thawn a, kan nawr hnuah min phalsak. Lungleiah pawh hian hman an phal theih nan ICMR hotupa ka be tawh a, kan bun theih chuan hman phalna min pe turin ka ngen lâwk. ICMR phal hnuah National Institute of Virology, Pune phalna lâk a ngai leh dawn a ni," a ti.

RNA automated extraction system kháwl a awm hnua sample test beisei anga a tam theih loh chhan sawiin Health Minister chuan, "A hman theih tura buatsaih fel a nih hnuah, kháwl thar ngang a nih avangin thawktute'n duh angin an bel tâwk lo. An bel ve zel a, Thawhṭanni kha chuan sample 600 vel an test thei tawh a, test zat a tam zel beisei a ni," a ti a; ni khata sample tam zawk endik a nih theih nan sorkarin theihtawpa a chhuah thu a sawi.

Health minister Dr R Lalthang­liana sawi danin, RTPCR hmanga sample endik turin ICMR-in phalna a pek nih a ngai. Chumi tur chuan training a ngai a, tun­ah hian ICMR-in phalna a pek ZMC-ah doctor pahnih, laboratory technician pahnih, scientist B leh C pakhat ve ve an awm. Chu'ng mite chu harsatna tâwk ve thei an nih avangin tunah hian ICMR-in phalna a pek theih nan Silchar Medical College-a training turin doctor pahnih leh laboratory technician pahnih tirh leh mek a ni.

Lunglei Civil Hospital-ah RTPCR hman theih a nih chuan, microbiologist leh laboratory technician awm sa mah se, Covid-19 kaihhnawihah swab sample endik turin Silchar Medical College-ah an training ve phawt a ngai dawn. Training hun chhung a rei lo a, ni hnih velah ICMR-in phalna a pe thei a ni.

Tun dinhmunah Lungleiah hian RTPCR kháwl chi khat 'TRUENAT' pahnih dah a ni a, chu khawlah chuan ṭum khatah pakhat chauh barh luh theih a ni. Panga barh luh theih khawl a awm leh tawh a, chung chu district danga dah tura buaipui mek a ni thung.

Dr R Lalthangliana chuan, quarantine centre atana kohhran leh khawtlangin an hmunhmate luah man awm loa hman an phalsak chu lawmawm a tih thu a sawi a, "Rei tak inmikhual hi thil harsa a ni. Quarantine centre-a awm mekte hi ṭhenkhat chu ni 21 awm tling tawh, RTPCR result la chhuah loh avanga chhuak thei lote an ni. Sample lak khawm sa la test lo a tam deuh vang a ni a, ngaihdam ka dil a ni. Ni 21 hmaa result a chhuah vek theihna atan hma kan la a ni," a ti.