Zan lama curfew la puan tlat hi rorelna awmze nei lo a ni - MPCC

Mizoram Pradesh Congress Committee (MPCC) Media department chuan nimin khan Aizawl Press Club-ah thuthar thehdarhtute an kâwm a; chhûn lama khawsak pangngaia khawsak vek a nih tawh laia zan lam curfew (zan dar 9 - zing dar 4) khauh taka kengkawh tura tih chu rorelna awmze nei lo nia an ngaih thu an sawi.

MPCC Media chairman Dr Lallianchhunga chuan, Mizoram sorkarin Covid-19 avanga inkaihhruaina (SOP) a tihchhuahah rêng rêng chiang takin kohhran inkhawma zai phal a nih loh thu tarlan a ni ṭhin tih sawiin, "November 30, 2021-a SOP thar berah chuan kohhran inkhawmnaa zai theih tur leh tur loh chiang taka tarlan a ni ta lo. Kristiante hunpui Krismas kan hmachhawn dawn lai mekin inkhawmnaa zai leh zai loh chu kohhran thutlukna siam turah a dah ta daih a ni," a ti.

Covid-19 léng chungchangah MNF sorkarin eng thilah pawh mawhphurhna a la ngam ngai lo nia sawiin Dr Lallianchhunga chuan, “Eng emaw palh a thlen pawha kohhranin dem a kài theihna turin kohhran lakah thang a kam tihna a ni,” a ti a; sorkar rorel dan chu rorelna zahpuiawm tak leh kohhran zah lohna niin a sawi.

MPCC Media Chairman chuan, chhûn lama khawsak pangngaia khawsak theih a nih tawh thu tarlangin, “Picnic spot thlenga hawn a nih tawh laia zan lam curfew khauh taka kenkawh tura tih a la ni reng hi rorelna awmze nei lo leh puitling lo tak a ni a, mipui harsatna siamtu mai a ni. Sorkar ṭha lo kan hrawn mek a ni tih tilang chiangtute zinga mi a ni,” a ti.

MPCC Media hruaitute chuan, Congress party chuan sorkar ṭha siam an tum thu sawiin, “Mipui tan rintlak kan nihzia lantir tumin kan insiamṭha mek. Opposition party ṭha tak nih tumin nasa takin hma kan la mek a, sorkar kan khalh ngilna tur kawngah leh mipui thlavâng hauha kan chêt zelna turah thuràwn leh information/document pawimawh kan dawng thei reng a ni,” an ti a; Mizoram siamṭhatna kawnga thawhpuiah Mizoram mipui an sáwm a ni.

MPCC Media tarlan ṭhenkhat
• MNF sorkar hi sum leh pai enkawlna kawngah a hlawhchham chiang hle. Sorkar hnathawk tam takin kum khat hnuah pawh an pension pawisa an la thei lo a, officer lian leh sawipuitu nei ṭha deuhte pension pawisa pek chhuah a nih reng laiin sawipuitu nei ve lo mi náwlpuite pension pawisa erawh tam tak hrènsak an la ni.

• Covid-19 vang ni lo, sum enkawl thiam loh vangin Mizoram sorkarin healthcare bill leh contractor bill vaibelchhe tam tak an batsak mek.

• MNF party a din tirh aṭanga chhûtin, MNF an sorkar apiangin Mizoramah thil dik lo nasa takin a hluar zel. Tun sorkarah pawh kum 10 kal taa MNF sorkar hun lai ang thoin advertisement chhuah loa hna lak a tam leh hle tawh a, MPSC hna lak tur tam tak pawh an duhsak zawngte an thun theihna atan departmental-a lak a ni.

• MNF sorkarah MLA-ten department-a information an mamawh an dilte pawhin ngaihven a hlawh lo a, NABARD hnuaia school building sak thar leh repair hna cheng vbc. 35 man an thawh mek chungchanga Congress MLA pakhatin November 19, 2021-a School Education department-a zawhna a siam pawh tun thlengin a chhanna chu sawi loh, danin a sawi angin acknowledgement pawh pek a la ni lo.
• MNF sorkar hian Congress sorkarin Mizo ṭhalaite rilrua inelna thianghlim a lo siam tawhte thlengin an tichhe vek. MNF chêt dan tam tak en hian Mizoram mipui hian duh kan thlang sual chiang hle-ah kan ngai.