Omicron-ah sawi chian theih la awm lo ; Mi sawi ṭhaih lo turin mi tin chah an ni

State Level Expert Team on Covid-19 Management member Dr PC Lalramenga chuan nimin khan Covid-19 chhuak thar, Omicron chungchangah thuchhuah a siam a; rinthu leh thu lakna belhchian dâwl lo hmanga mipui sawi ṭhaih lo turin mi tin a ngen.

Dr PC Lalramenga chuan, Omicron chu zir chian mek a nih avangin tun dinhmunah a hlauhawm leh hlauhawm loh sawi theih a la nih loh thu a tarlang a, "Mithiamte'n an zir chiang mek a, a hlauhawm leh hlauhawm loh hre turin a tlem berah kar hnih tal hun a duh," a ti a; hri laka him turin sorkar inkaihhruainate zawm ṭhat a pawimawh tih a sawi.

Omicron chu November 19, 2021 khan Africa khawmualpuia Botswana ram aṭanga South Africa-a damlo inentir tura kal mi pakhatah hmuh a nih thu sawiin Dr Lalramenga chuan, “Mithiamte’n châwl loin ni thum chhung Covid-19 positive tharte an zir chian hnuah virus chhuak thar a ni tih an finfiah a, WHO hriattir nghalin, WHO chuan chhui zui ngai leh ngaihtuahawmah a puang zui a ni,” a ti.

State Level Expert Team on Covid-19 Management chuan India ram páwn aṭanga rawn lutte dawnsawn dan tur leh an zawm tur rawtna sorkarah an thlen tawh thu sawiin, rei lo têah Mizoram sorkarin a tihchhuah an beisei thu a tarlang a; Covid-19 thawh khatna leh thawh hnihna chu Mizoramin hmun dang aia a dawng tlai ang bawkin Omicron pawh a rawn thlen tlai leh ngei a rinawm thu leh, hmun dang boruak thlirin uluk taka lo inbuatsaih theihna hun a awm theih thu a tarlang bawk.

Dr Ramenga tarlan ṭhenkhat
• Omicron hi zir chian mek a ni a, a hlauhawm leh hlauhawm loh chungchangah sawi chian theih a la awm lo.
• Omicron hi Covid-19 virus hmuh chhuah tawhte aiin protein spike (a hlíng lawr chhuak) a lêtin a tam zawk.
• Protein spike a tam avangin Delta variant aiin inkài chhàwn a awlsam dawn.
• Chawlhkar hnih liam ta chhung khan South Africa-ah kai thar a lêt li-in an pung.
• Kum 2020 laihâwl aṭang khan Covid-19 virus insiam danglam strain chi hrang hrang hmuh ṭan a ni.
• WHO-in chhui zui ngai leh ngaihtuahawm a tih bikte chu Alpha, Beta, Gamma, Delta leh Omicron-te a ni.
• Tun dinhmunah khawvela Covid-19 vei zinga 99.8% chu Delta variant kai an ni a, Omicron hian a luah lan thuai tura ngaih a ni.
• Ram 23-ah Omicron hmuh chhuah a ni tawh.