RD Minister-in Mizoram mamawh a thlen

Rural Development minister Lalruatkima chuan nimin khan New Delhi-ah Ministry of Rural Development (MoRD) leh Ministry of Home Affairs (MHA) hotute a kâwm a; MGNREGS leh BADP hnuaia Mizoramin sum a la dawn lohte pe chhuak thuai turin a ngen.

Sorkar thuchhuah tarlan danin, Lalruatkima chuan, MoRD secretary Nagendra Nath Sinha hnenah sorkar laipuiin MGNREGS hnuaia wages a la pek chhuah loh leh second instalment-te pe chhuak thuai turin a ngen a; Nagendra Nath Sinha chuan a lo bawhzui thuai tur thu a hrilh a ni.

Minister hian MHA hnuaia Border Management Division secretary Dr Vivek Joshi chu Border Area Development Programme (BADP) chungchang a sawipui a; kum 2021-22 a BADP kalpuina tur leh kum 2020-21 chhunga BADP sum la pek loh 2nd tranche cheng nuai 1,228.95 a rang lama pe turin a ngen. Dr Vivek Joshi chuan, a ṭul anga a lo bawhzui tur thu leh a rang thei ang bera 2nd Tranche chu pek an tum tur thu a lo hrilh.

Lalruatkima chuan December 1, Nilaini pawh khan New Delhi-ah sorkar laipuia a department enkawl kaihhnawih hotute a kâwm tawh. Department of Land Resources (DoLR) secretary Ajay Tirkey hmuin, PMKSY-WDC phase-I a tàwp tâk avanga a chhunzawmna tur PMKSY-WDC 2.0 project atan a rang thei ang bera sum pe turin a dil a; DoLR Secretary hnenah hian Mizorama Land Revenue & Settlement department hnuaia hmalakna hrang hrang leh mamawhte a thlen.

DoLR Secretary chuan, PMKSY chu tlangzarh thuai a nih tur thu leh Mizoram tan sum a rang lama an pek chhuah tur thu a lo hrilh niin sorkar thuchhuakin a tarlang.

Ministry of Rural Development joint secretary Rohit Kumar, MGNREGS enkawltu pawh kâwmin Lalruatkima chuan, Mizorama MGNREGS hnuaia thingtlang mipui job card neite inhlawhna sum September 2021 aṭanga an la dawn loh chu a rang thei ang bera pe chhuak turin a ngen.

Rohit Kumar chuan, mipui inhlawhna wage component chu an sanction thuai tur thu leh job card holder-te bank account-ah an thun tur thu a lo hrilh a ni.

Shyama Prasad Mukherji Rurban Mission (SPMRM) changtu joint secretary Dr Biswajit Banerjee pawh a hmu a; SPMRM (Rurban) hnuaia cluster pali awm meka hmalakna leh hmasawnnate sawipuiin, cluster a tam thei ang ber pek belh turin a ngen. Dr Biswajit Banerjee chuan, Minister dilna leh thu thlente chu an lo ngaih pawimawh tur thu leh hma an lo lak zui tur thu a hrilh.

Minister Lalruatkima hi Rubber & Allied Sector Development Board vice chairman Lalrinsanga Ralte, MLA-in a ṭawiawm a ni.