Hnahthial khelmuala phûl lem phah hawng

Hnahthial Block Sports Committee Ground No. 2-a phûl lem phah thar chu nimin khan bialtu MLA minister Dr R Lalthangliana'n a hawng. Phûl lem phahna atan hian North Eastern Council aṭanga hmuh cheng nuai 682.90 hman a ni.

Dr R Lalthangliana chuan, a bialah Sports Minister ṭhahnemngaihna avanga khelmual thar ṭha tak hawn theih a ni chu lawmawm a tih thu a sawi a, "Hnahthial district hi infiamnaa mi hmingṭha chhuah tamna a ni. Sport hi mi tam takin an eizawnna hmun tur a ni tih hriain Mizoram sorkarin industry pakhat angin kan pass tawh a, chu chuan thil tam tak a keng tel a ni," a ti.

Mizorama district thar pathumte chu MNF-in sorkarna an chelh aṭanga thla riatnaah a taka a kal vek thu sawiin R Lalthangliana chuan, "Fùke la kim tawk lote pawh chak taka thuam zel a nih laiin, Covid avangin kum khat leh thla 10 zet kan buai a, sorkar sum min ei hêk hle a, chutiang karah pawh field ṭha tak sorkarin min siamsak hi a lawmawm hle a ni," a ti a; kum 2022-ah Hnahthialah Account & Treasury dah ngei tum a nih thu a sawi.

Khualzahawm Robert Romawia Royte, Sport minister chuan, khelmuala phûl lem phah chu sorkar hmasa hun laia bul ṭan a nih thu sawiin, Sports minister hmasa Zodintluanga Ralte fakawm a tih thu a sawi a, "Tluang takin a kal zel dawn emaw tih laiin NEC aṭangin tihtawp a ni thut a, ka minister tirha kan department-a issue lian ber chu Hnahthial leh Saitual khelmual siam, hna ṭan tawh si, chawlh lailâwk ni tate ṭan leh tura hmalak a ni. He thil hi inpuhmawhna chi a ni lo a, hmingṭhatna lak bikna tur a awm lo," a ti.

Hnahthial Block Sports Committee Ground No. 2 hi a dung metre 110 leh a vâng metre 75 a ni a, football khelmual chin chu a dung metre 105 leh a vâng metre 69 a ni.