National Pollution Control Day pualin Aizawlah Cycle Rally buatsaih a ni

Mizoram Pollution Control Board (MPCB), Mizoram Envis Hub leh Mizoram Cycling Association (MiCA) bultumin nimin zing khan National Pollution Control Day pualin Aizawlah Cycle Rally buatsaih a ni a, cyclist 60 chuang Sikulpuikawn aṭanga Bawngkawn thleng thirsakawrin an tlân.

Sikulpuikawna inkhawm tâwi buatsaih kaihruaitu MPCB member secretary C Lalduhawma chuan, thianghlimna chu Mizote nena inhmeh tak a ni tih sawiin, “Mi dangte tana boruak chhia kan siam loh a, kan hawihhàwm chuan pollution kan thunun mai dawn a ni,” a ti a; MPCB-in boruak chhia tichhuak ngai lo cycling chhungkua an thawhpui thei chu lawmawm a tih thu a sawi.

MiCA president Dr Franklin Lalrinngheta chuan, Mizoram cycling chhungkuain thawhpui ṭha tak tak an nei ṭhin chu lawmawm a tih thu sawiin, “Hriselna leh boruak thianghlim ngai pawimawhtu cyclist-te’n MPCB kan thawhpui thei hi kan lawm hle a ni,” a ti.

MiCA finance secretary Lalnunpuia pawhin thu sawiin, “Cyclist nih duh tâwk mai loa ṭan kan lak hret chuan kan chhehvel boruak tihthianghlim kawngah danglamna nasa tak a thleng thei dawn a ni,” a ti a; cyclist-te chu tun aia boruak tihthianghlim kawnga ṭang leh hret turin a chah.

Inkhawmah hian PCCF Jitendar Kumar-a’n MPCB mobile application thar a tlangzarh a ni.