Pipe phûm dan SIPMIU hotu sawipui

ZPM Ṭhalai hruaitute chuan nimin khan State Investment Programme Management Implementation Unit (SIPMIU) project director Lalrothanga chu a pisaah an kâwm a, SIPMIU hmalaknaa pipe phûm chungchang sawipuiin, khawpui hmun hrang hranga pipe phûm danah mipui tana him lo a awm an hlauh thu an hrilh.

ZPM Ṭhalai hruaitute chuan, Aizawl khawpuia pipe phûmnaa pipe welding dana an ngaihṭhat lohnate SIPMIU Project Director hnenah an thlen a; kawng siam zawh hlim laih chhiat leh mai a ni ṭhin chu pawi an tih thu sawiin, kawng laih chhiat leh siam ṭhat chungchangah PWD nena thawhhona ṭha nei tura an duh thu an thlen bawk.

Kawng laih chhiat chungchangah SIPMIU Project Director chuan theihtawp an chhuah mek thu a sawi a; mipui tana him tura pipe an siam theih nan test hrang hrang an kalpui thu a sawi bawk tih ZPM ṭhalaite chuan an tarlang.

ZPM Ṭhalai chuan, SIPMIU-in pipe an siam leh phûmte a ṭhat leh ṭhat loh an enchhin dan chu mipuiah uar zawka puanzar ni se an duh thu an sawi a, “Test an neih dan te, test an neih ní leh a mawhphurtu signature hi felfai taka vawn ṭhat ni se kan ti,” an ti a ni.