Mizoramah Covid-19 vei enkawl mek 2.51% an awm
December 1, Nilaini khan Mizoramah Covid-19 vei mi 275 hmuh chhuah a ni a, hripui vei enkawl mek 3,404 percentage chu 2.51% a ni. Nimin khan hripui vei dam tawh mi 368 chhuahtir an ni a, niminah Covid-19 vanga thi an awm lo.
Covid-19 vei Nilainia hmuh thar mi 275-te chu mipa 131 leh hmeichhia 144 an ni a; ZMC laboratory-a hmuh chhuah 52, TrueNAT hmanga hmuh 10, RAT hmanga hmuh 210 leh Fluorescent Immunoassay (FIA) hmanga hmuh pathum an ni.
IDSP record angin, Mizoramah Covid-19 vei 1,35,450 hmuh chhuah a ni tawh a, mipa 65,432 leh hmeichhia 70,018 an ni a, mipa aiin hmeichhia 4,586-in an tam zawk. Nimin tlai dar 5 thleng khan mi 1,31,545 (97.12%) chhuahtir an ni tawh a, mi 501 (0.37%) thi tawhin, enkawl mek mi 3,404 (2.51%) an awm.
December 1, Nilainia Covid-19 vei hmuh thar mi 275 zingah symptom nei mi 157 an awm a, mi 118 erawh chuan symptom an nei lo. Nilainia swab sample endikah district pangaah positivity rate 10% chung lam a ni a, positivity rate sanna ber Serchhip district-ah 22.45% a tling. Positivity rate 10% chung lam dangte chu - Champhai 21.79%, Aizawl 11.08%, Hnahthial 10.15% leh Lunglei 10.04% a ni.
Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. December 1, 2021 thlenga swab sample endik tawh 14,36,428 aṭanga RT-PCR hmanga endik zat percentage chu 22.60 a ni a, RAT hmanga endik zat chu 71.49% a tling.
Kum 2011 chhiarpui aṭanga chhûtin, Mizorama Covid-19 vei hmuh tawh 1,35,450 chu mi 1,000 zelah hripui vei mi 123 an awm ang a ni a; mi 1,00,000 zela Covid-19 vangin mi 45 an thi tawh ang a ni tih sorkar thuchhuakin a tarlang.
Nimin khan tlai dar 5 thlengin hripui vei dam tawh mi 368 chhuahtir an ni a; Aizawl district-ah mi 167, Lunglei district-ah 57, Serchhip district-ah 26, Lawngtlai district-ah 23, Kolasib district-ah 21, Champhai district-ah 20, Mamit district-ah 19, Khawzawl district-ah 18, Hnahthial district-ah 15 leh Siaha district-ah mi pahnih an chhuak a ni.
