Skywalk leh ropeway thubuai ACB-in an chhui phawt dawn

Sakawrhmuituai tlanga skywalk leh Chaltlang-Durtlang inkara ropeway siam chungchanga MNF-te'n thubuai an thehluh chungchangah chhui lailâwk hna (preliminary inquiry) chu Anti Corruption Bureau (ACB) tih turin Lokayukta chuan thutlukna a siam.

Sakawrhmuituai tlanga skywalk leh Chaltlang-Durtlang inkara ropeway siam chungchangah hian MNF party-a Vigilance department leh Legal Board-te chuan November 22, 2021 khan Lokayukta-ah complaint an thehlut a ni.

MNF tarlan danin, Sakawrhmuituai tlang skywalk atan 10% mobilisation advance zat tur chu cheng nuai 48.50 a nih laiin cheng nuai 287.25 pek chhuah a ni a; Durtlang-Chaltlang ropeway atan 10% mobilisation advance zat tur chu cheng nuai 248.25 a nih laiin cheng nuai 1,317.80 pek chhuah a ni. Mobilisation advance sumte chu Tourism department-in kum 2017-2018 inkarah a pe chhuak niin a lang.

Lokayukta chuan MNF-in complaint an thehluh chu thu tlingah ngaiin, thubuai an ziak lut a, an zir chian hnuah tun hnai khan kalpui zel dan turah thutlukna an siam. Lokayukta chuan he thubuai hi a tirah chuan Central Bureau of Investigation (CBI) chhuitir ngei turah ngai mah se, preliminary inquiry chu ACB kutah an dah a ni.

CBI hnena thubuai chhui tura tih a nih loh chhan chu Lokayukta-in a hmaa thubuai pahnih CBI chhuitir tura an tihah Mizoram sorkarin CBI phalna a pek loh avangin tun ṭumah pawh phalna pek an nih loh hlauhna avang te, complaint chu Mizo ṭawng veka tih a ni a, CBI tan buaithlakna chin a awm theih dawn avangte leh, thubuai thehluttute'n thil dik lo tia puh an neih loh vangte a ni.

Vanglaini thu dawn danin, ACB chu ni 45 chhungin an report Lokayukta-ah thehlut tura tih an ni a; an report zir chian a nih hnuah a ṭul chuan Lokayukta chuan CBI-ah thlen an tum a ni.

Tarlan tawh angin, Mizoram Pradesh Congress Committee (MPCC) chuan thuchhuah siamin, Swadesh Darshan Scheme-II hnuaia skywalk leh ropeway siam chungchanga thil fel lo awm nia lang chu CBI chhuitir ngei ni se an duh thu an tarlang.