Tangkhang haw phurtu maxi-cab driver-te Covid-19 hripui lakah an fihlim

Ram puma inkhàrkhip vanga state páwna Mizo tangkhangte lo haw, R Dengṭhuama Hall aṭanga Aizawl khawpui chhung leh Aizawl district-a khaw hrang hranga an awmna tur quarantine centre thlenga phurtu maxicab driver-te chuan, mi ṭhenkhatin an thinhrik deuh nia an hriat thu an sawi a; chutih rualin, tun hnaia sample test result chhuakah Covid-19 an vei loh vek thu an sawi bawk.

Interstate Maxicab Service Association (IMSA) general secretary Joseph L Vanchhawng sawi danin, state pawn aṭanga rawn hawte chu R Dengṭhuama Hall aṭangin an khua/vengah an phur haw ṭhin a, chumi atan chuan May 30, 2020 aṭangin maxicab 40 vel hman a ni.

Rawn hawte chu Mamit, Champhai, Kolasib, Saitual, Lawngtlai leh Siahaahte an dah ṭhin a, Aizawla quarantine centre, bus kal theih lohna hmunahte an dah bawk ṭhin. A tirah lirthei nei mi 10 vel chu hlauh vangin an kîr leh thung. Aizawl pawn lama an kalnaah an paltlang khua zinga eng emaw zatin an khuaah din an phal lo ṭhin.

Thingtlanga an kalna khuaa quarantine centre an thlenin, ei tur an lo pe ngai meuh lo nia sawiin Joseph Vanchhawng chuan, "Driver-te hian insawi nacháng an hre lo thei a, a ṭhenah chuan an lo thinhrik ve thung," a ti a; driver zingah tlaivara tlân an awm nual thu a sawi.

Joseph L Vanchhawng chuan, Mizoram sorkar erawh chuan anmahni a ngaihsak ṭha niin a sawi thung a; an lirthei chu damdawi hmanga an phuh ṭhin thu te, driver ṭhutna leh an hnung lam chu an zar hliah thu leh inpawh theih a nih loh thu te, passenger-te bungrua an khawihpui ngai loh thu leh PPE pek vek an nih thute a sawi.

IMSA General Secretary chuan, R Dengṭhuama Hall-ah driver 10 vel, mahni in lama la haw ngam lo an awm tih sawiin, "Quarantine ho nen an inawm pawlh lo. Sorkarin a châwm reng nih hi an inthlahrung ve a ni," a ti a; driver-te swab sample endikte chu June 13, 2020 tlaiah result a chhuak a, hripui an vei loh vek thu a sawi bawk.

An sawi danin, IMSA-ah member 300 vel an awm a, Meghalaya leh Assam lama khualzin phura tlânte an ni. Lockdown vangin thla khatah lirthei pakhatin Rs. 40,000 vel zel an hloh a, an member mi 300-te chuan lockdown vangin thla khatah Rs. 1,20,00,000 vel leh lockdown thla thum chhungin Rs. 3,60,00,000 vel an hloh tawh ang a ni.