Scho' pek phûtin zirlai an pungkhawm

Post matric tribal scholarship la dawng lo zirlai eng emaw zat chu lungawi loin nimin khan Chief Minister Office thlangah leh Mizoram Scholarship Board (MSB) kawtah an pungkhawm. Scholarship hi zirlai 5,000 chuangin an la dawng lo nia thu dawn a ni.

Thu dawn danin, post matric scholarship hi zirlai 32,000 velin an dil a, chu'ng zinga a tam zawk chuan an dawng tawh. Chutih laiin, mi 5,490 velin an la dawng lo a, dilna hnâwlsak mi 170 vel an awm bawk.

Nimina nawrh huaihawtnaa zirlai hruaitute chuan Vanglaini palai zawhna chhángin, scholarship sem dan chu lungawithlak loh an tih thu an sawi a, "A ṭhenin an dawn loh laiin a ṭhenin an dawng nawn (double) a, a chingpen nasa hlein kan hria," an ti.

Sorkar laipui aṭanga sum hmuh vek tawh, sem chhuah kim a la ni lo chu hriatthiam harsa an tih thu sawiin zirlai hruaitute chuan, "MSB leh sorkar laipuiin pawisa a rawn dahna HDFC bank hotute pawh kan hmu tawh. HDFC lamin MSB aṭanga phalna an hmuh hunah an sem theih tur thu an sawi laiin, MSB lamin system a chian loh avangin eng mah an kaltir (initiate) theih loh thu te, Public Finance Management System an hman hnuah file a kal ṭhat theih loh thu leh an hriatthiam bik loh thute min hrilh," an ti a; scholarship chu sem thuai a nih loh chuan an kal zel dan tur an la ngaihtuah leh dawn thu an sawi.

Vanglaini thu dawn danin, dilna hnâwl leh tihkhawtlai (pending) zinga tel lo, scholarship la dawng bawk si lo mi eng emaw zat an awm a ni.

Bank account khawih chêt loh vanga lut ṭha thei loa sawi ṭhin chungchangah zirlaite chuan, "Scholarship kan nghahhlelh avangin ni khatah vawi hnih/thumte bank account-te kan update ṭhin a, a lut chuang lo," an ti. Zirna hmun pakhata lut, zir inang zingah scholarship dawn zat inang lote pawh an awm thu an sawi bawk.