KHAWTHLIR

Thisen pe
Lunglei College NSS chuan December 1&3 khan thisen pek an huaihawt a, Civil Hospital, Lunglei tan thisen unit 47 pein, petute mipa 33 leh hmeichhia 14 an ni. KṬP, Tlangnuam Branch, Aizawl pawhin nimin khan Civil Hospital, Aizawl tan thisen unit 18 an pe a, petute mipa 16 leh hmeichhia pahnih an ni.

Faina beihpui thlak
GM Higher Secondary School, Champhai chuan kum 25 (silver jubilee) tlin an lawmna pualin nimin khan zirtirtu leh zirlaite'n Champhai khawpui hmun hrang hrangah faina beihpui thlakin an hnatlang a, Champhaia IPRO Dr Lallawmkima'n a hmanpui. Zirlaite leh zirtirtute chu hmun 10-ah inṭhenin khawlaia bawlhhlawhte an thianfai a ni. GM HSS hi June 25, 1996-ah din a ni a, zirlai 730 leh zirtirtu 27 an awm mek a ni.

Report tlangzarh
World Disabled Day puala Social Welfare & Tribal Affairs department-in an buatsaih, ‘Persons with Disabilities in Mizoram - Survey Report’ chu nimin khan Social Welfare minister Dr K Beichhua'n a pisaah a tlangzarh. Report-a a lan danin, Mizoramah rualbanlo inhriattir 13,418 an awm a, chung zinga 27.9% chu Aizawl district-a awm an ni.

Sorkar kum tharah SEDP a taka Kalpui kan tum - Dr R Lalthangliana
MNF adviser Dr R Lalthangliana, minister chuan, sorkar kum tharah MNF sorkarin SEDP a taka kalpui ṭan a tum thu a sawi. Nimina a bial chhung khaw hrang hrang a tlawhnaah Dr R Lalthangliana chuan, SEDP chu kum hmasa lamah pawh kalpui duh mah se, Covid-19 avangin an kalpui hleih theih loh thu a sawi a, “Sorkar kum thar April thla hnu lamah chuan budget tharah a tak taka kalpui ṭan kan tum,” a ti. Health minister R Lalthangliana chuan, Health department ringawtin post ruak 3,000 vel an nei a, Covid-19 avangin an hnawhkhat hlei thei lo tih a sawi a; sorkar kum tharah Covid dinhmun a ziaawm chuan hmalak chhoh an tum thu a sawi bawk.

UPSC Prelims-a tlingte lawmpui
Mizoram Synod hnuaia Zirlai Viltu Committee chuan December 1, 2021 khan Synfo Studio-ah UPSC Preliminary exam-a tlingte lawmpuina hun an buatsaih a, Synod moderator Rev. Dr C Lalhlira’n a hmanpui.
Lawmpuina inkhawm hi Synod executive secretary (i/c Zirlai Viltu Committee) Rev. K Lalrinmawia’n a kaihruai a, Synod Moderator-in UPSC Preliminary exam-a tling mi pasarih hnenah lawmpuina a hlân a, C Lalsawta, IAS (Rtd)-in thu a sawi. Mi pasarih hnenah hian kohhran pawl thliar loin an inbuatsaih zelna atan Rs 50,000 ṭheuh hlan a ni a, lawmpuina pek zingah pawh ECM kohhran mi pahnih leh BCM kohhran mi pakhat an tel a ni.