Mamitah thisen pe ṭhate chawimawi

Association for Vo­luntary Blood Donation (AVBD), Mamit chuan nimin khan Kumtluang Hall-ah World Blood Donor Day an hmang a, an district chhunga thisen pe ṭhate an chawimawi.

World Blood Donor Day hmanna inkhawm hi Mamit AVBD finance secretary Lalruatkima'n a kaihruai a, secretary Lalropuia'n thisen peka Mamit district din­hmun a sawi. President Laltlankima'n thu sawiin, mimal, tlawmngai pawl, kohhran ṭhalai pawl leh pawl dang, thisen petu zawng zawng chungah lawmthu a sawi a, "Thi­sen petute hi nunna chhantu an ni a, chawimawi leh zah an phú hle. Hripui vanga harsatna kan tawh mek lai pawhin thisen mamawhna a sang zel a, ṭhalaite'n thisen pek kan uar zel a ngai a ni," a ti.

Inkhawmah hian April 2019 leh April 2020 in­kara Mamit District Hos­pital blood bank-a thisen pe ṭhae hnenah chawimawina thilpek an hlân a; tlawm­ngai pawl (NGO & other) zingah Hmarveng Branch YMA (unit 53), kohhranṭhalai pawl zingah Zawlnuam Bawrai Branch KTP (Unit 35), group/institution zing­ah 4th IR Batta­lion (unit 51)-te chu thisen pe tam berte an ni.

April 2019 leh April 2020 inkara thisen vawi li petu CK Lalhril­liana, Mamit Venghlun, hmeichhia thisen pe tam ber Lalfamkimi, Mamit Venghlun (unit 4) leh thisen petu zinga upa ber Zarzoliana Khiangte, Luangpawl (kum 60)-te hnenah chawimawina an hlan bawk.