ZPM Ṭhalaiin CBI ko lut turin CM ngen ; Thu dik hâi lan phûtin an pungkhawm

ZPM Ṭhalai chuan nimin khan Swadesh Darshan Scheme hmanga Sakawrhmuituai tlanga skywalk leh Chaltlang-Durtlang inkara ropeway siamna tur sum chingpen nia lang chhui tura Central Bureau of Investigation (CBI) ko lut turin chief minister Zoramthanga an ngen a; Vanapa Hall kawtah thu dik hâi lan phûtna punkhawm an huaihawt bawk.

ZPM ṭhalaite hian an senior vice president Dr C Lalrammawia hmingin Chief Minister hnenah ngenna lehkha an thehlut a; Sakawrhmuituai tlanga skywalk leh Chaltlang-Durtlang inkara ropeway siamna tur sum a chingpen nia a lan thu tarlangin, "Mipui sum tihchingpenna hian mipui a barakhaih hle. A mawhphurtute zawn chhuah an nih theih nan CBI ko luh ngei ṭhain kan hria a, mipui chan ai eirûknaa inhnamhnawihte'n hremna an hmuh theihna tura CBI ko lût ngei turin kan ngen che a ni," an ti.

Nimina Vanapa Hall kawta 'Thu dik hai lan phûtna punkhawm' an huaihawtah Dr C Lalrammawia chuan, skywalk leh ropeway siamna tur sum pek chhuah dan chu sawifiah turin Finance minister hlui Lalsawta leh Tourism minister hlui John Rotluangliana te an phût tih a sawi.

Dr C Lalrammawia chuan, skywalk leh ropeway siamnaah estimate aia tam sum pek leh hna thawh mumal awm si loa sum pek chhuah zui zel nia sawi chuan mipui beng a verh tih sawiin, "Sanction aia tam sum pek chhuah a nih chungchangah hian kha tih laia Tourism Minister bakah, Finance minister Pu Lalsawta hi eng kalphung hmanga sum pek chhuah nge a nih insawifiah turin kan phût tlat a ni," a ti.

ZPM Ṭhalai Sr Vice President sawite
 Swadesh Darshan website-a a lan danin, Swadesh Darshan hnuaiah Mizoram Eco Circuit-II kalpui nan March 27, 2017 khan cheng vbc. 9907.09 pek chhuah a ni a, tourism project hrang hrang kalpui niin, skywalk leh ropeway siamna tur pawh a tel.

 Sakawrhmuituai tlanga skywalk siam leh Durtlang-Chaltlang ropeway siam chu kum 2018-a zawh tawh tur ni mah se, tunah chuan hna thawh tur 4-5% vel âwrh an zo anga sawi a ni.

 Hna thawk tur lakah Tourism minister hlui John Rotluangliana’n project siamtu an nih avanga restricted tender hmanga pek a nih thu a sawi kha pawi kan ti.

 Kum 2019-a CAG report-in a tarlan dan chuan, Mizoram Eco Tourism Circuit Project-ah cheng vbc. 2.41 hman sualna lian tak a awm thu a lang.

 Hna thawk tura joint venture NEIP and Ropeways & Resorts Pvt. Ltd, Delhi thlan a nih danah hnungthak inhiah tawnna lian tak a awm kan ring.

 Ropeway siamna atan cheng nuai 1317.80 leh skywalk siamna atan cheng nuai 242.50 contractor hnena sanction a nih chungchangah Tourism Minister hluiin tun thlenga thleng thei lo bungraw chah nana hman a nih thu a sawi kha pawm harsa kan ti.