Governor-in Chawngte a tlawh

Governor Dr Hari Babu Kambhampati chuan nimin khan Chakma Autonomous District Council (CADC) hmunpui, Chawngte (Kamalanagar) a tlawh a, Tuichawng bialtu MLA Dr BD Chakma, CADC chief executive member (CEM) Rasik Mohan Chakma, Lawngtlai DC Dr Andrew H Vanlaldika leh official dangte’n an lo dawngsawng.

CADC Rest House tuala amah lawmna inkhawmah Larsap chuan, “Hmasawnna kawngah ram chhung hmun dang nen khaikhina ADC huam chhunga mite an hnufual bik ṭhin hi a pawi hle,” a ti a; state sorkar leh district council hnuaia thawkte chu ram bial leh mi chengte hmasawn nana theihtawp chhuah chu an mawhphurhna a ni tih hre thar leh turin a chah.

Lawmna inkhawm zawh hian Governor hian Lawngtlai district-a state sorkar leh CADC hnuaia department hotute a kâwm a; Lawngtlai DC Dr Andrew H Vanlaldika’n Chawngte Sub Division dinhmun tlangpui a sawi a, Lawngtlai SP DKS Singh-a’n Chawngte Sub-Division chhunga venhimna lam dinhmun tlangpui a lem nen a sawifiah bawk.