Mizoramah Covid-19 vei Enkawl zat a tlahniam zel

December 2, Ningani khan Mizoramah Covid-19 vei mi 315 hmuh chhuah an ni a, hripui vei mek 3,305 awmin, hmuh tawh zat aṭangin 2.43% a ni a, a tlahniam tial tial. Nimin khan hripui vei dam tawh mi 411 chhuahtir an ni a, Covid-19 vangin mi pakhat a thi.

Covid-19 vei Ningania hmuh thar mi 315-te chu mipa 139 leh hmeichhia 176 an ni a; ZMC laboratory-a hmuh chhuah 39, TrueNAT hmanga hmuh 16, RAT hmanga hmuh 259 leh FIA hmanga hmuh pakhat an ni.

IDSP record angin, Mizoramah Covid-19 vei 1,35,765 hmuh chhuah a ni tawh a, mipa 65,571 leh hmeichhia 70,194 an ni a, mipa aiin hmeichhia 4,623-in an tam zawk. Nimin tlai dar 5 thleng khan mi 1,31,956 (97.19%) chhuahtir an ni tawh a, mi 504 (0.38%) thi tawhin, enkawl mek mi 3,305 (2.43%) an awm.

December 2, Ningania Covid-19 vei hmuh thar mi 315 zingah symptom nei mi 209 an awm a, mi 106 erawh chuan symptom an nei lo. Covid-19 vei hmuh thar tarlan zingah zirna hostel pangaa mi 40 an tel a; Home Missions School hostel-a mi 19, Synod Nursing College-a mi 12, St. Joseph’s HSS hostel-a mi pali, ZMC Boy’s Hostel-a mi pali leh ZMC Girl’s Hostel-a mi pakhat an ni.

Ningania swab sample endikah positivity rate 10% chung lam district panga a awm a, positivity rate sànna ber Serchhip district-ah 28.32% a tling. Positivity rate 10% chung lam dangte chu - Hnahthial 20.97%, Champhai 16.87%, Khawzawl 12.64% leh Lunglei 10% a ni.

Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. December 2, 2021 thlenga swab sample endik tawh 14,39,908 aṭanga RT-PCR hmanga endik zat percentage chu 22.57 a ni a, RAT hmanga endik zat chu 71.52% a tling.

Kum 2011 chhiarpui aṭanga chhûtin, Mizorama Covid-19 vei hmuh tawh 1,35,765 chu mi 1,000 zelah hripui vei mi 124 an awm ang a ni a; mi 1,00,000 zela Covid-19 vangin mi 46 an thi tawh ang a ni tih sorkar thuchhuakin a tarlang.

Nimin khan tlai dar 5 thlengin hripui vei dam tawh mi 411 chhuahtir an ni a; district tina chhuak zat chu - Aizawl 139, Champhai 75, Lunglei 37, Lawngtlai 31, Siaha 24, Serchhip leh Khawzawl 20 ve ve, Saitual 19, Mamit 17, Hnahthial 16 leh Kolasib 13 a ni.