MBJP hruaitute'n PM an kawm

Mizoram BJP hruaitute chuan nimin khan an president Vanlalhmuaka hoin Parliament House-ah prime minister Narendra Modi an kawm a, Mizoram mamawh hrang hrang an thlen.

Vanlalhmuaka chuan Prime Minister hnenah Mizote leh Mizoramin harsatna kan tawh hrang hrangte thlenin, Mizoram chu India hmarchhak state zingah pawh hmasawnna kawnga hnufum ber a nih thu a sawi a, "Ngaihsak bik kan ṭul," a ti.

MBJP President chuan Prime Minister Scheme leh central scheme hrang hrangte a nihna tur anga hman a nih loh dan te; Mizoram chhunga central sorkarin suma pek hmanga hnathawhte endiktu central monitoring team tirh a ṭul thute leh central sorkar kaltlanga hnathawh mekte a bikin kawngpui siam mek te, rel kawng siam mek te, airport thawmṭhat mekte chu a hun taka thawh zawh a nih theihna atana ṭan lakpui tura ngennate Prime Minister hnenah hian a thlen bawk.